Fransanın daxili kəşfiyyat xidməti ABŞ-ın “Palantir” texnologiyalarından imtina edərək yerli alternativə keçməyə hazırlaşır.
MSNews.az xəbər verir ki, “Reuters”in məlumatına görə, Fransanın daxili təhlükəsizlik xidməti DGSI “Palantir”-in alətlərini Fransanın “ChapsVision” şirkətinin texnologiyaları ilə əvəz edəcək.
Fransanın Baş naziri Sebastyan Lekornu “X” platformasında yayımladığı videoda “ChapsVision”-un DGSI tərəfindən “Amerika nəhəngi “Palantir”-i əvəz etmək” üçün seçildiyini bildirib.
Bununla belə, keçid prosesi dərhal baş verməyəcək. “Palantir” şirkəti DGSI ilə uzunmüddətli müqaviləsinin 2025-ci ilin sonunda bir neçə il müddətinə yeniləndiyini və hələ də tam qüvvədə olduğunu açıqlayıb. Bundan sonra Fransa Baş nazirinin ofisi bildirib ki, “ChapsVision”-un sistemləri tam inteqrasiya olunana qədər “Palantir” alətlərindən istifadə davam edəcək.
“The Guardian” yazır ki, Fransa bu addımı xarici texnologiyalardan strateji asılılığı azaltmaq siyasətinin bir hissəsi kimi təqdim edir. Lekornunun sözlərinə görə, Fransa “rəqəmsal sahədə yeni strateji asılılıqları” qəbul edə bilməz.
Baş nazir bildirib ki, ölkə öz süni intellekt modellərindən və öz texnoloji alətlərindən istifadə etməlidir. Onun sözlərinə görə, Fransa təhlükəsizlik və dövlət xidmətləri kimi həssas sahələrdə xarici güclərin hazırladığı sistemlərdən asılı olmamalıdır.
“Financial Times”ın məlumatına görə, keçid prosesi 1 ildən 3 ilədək çəkə bilər. Bu müddət ərzində yeni sistemlərin qurulması, sınaqdan keçirilməsi və kəşfiyyat əməkdaşlarının hazırlanması nəzərdə tutulur.
“Palantir” milyarder Peter Til tərəfindən təsis edilib və şirkət uzun illərdir hökumətlərə, ordulara və təhlükəsizlik qurumlarına böyük həcmli məlumatların emalı və süni intellekt əsaslı analiz alətləri təqdim edir.
Son illərdə Avropa hökumətləri ABŞ texnoloji platformalarından, xüsusilə “Palantir”-in məlumat analitikası sistemlərindən asılılıqla bağlı daha ehtiyatlı mövqe tutmağa başlayıblar. “Reuters” yazır ki, Almaniya ordusu “Palantir”-dən imtina edib, Böyük Britaniyada isə Milli Səhiyyə Xidmətinin şirkətlə 330 milyon funt sterlinqlik müqaviləsi yenidən nəzərdən keçirilir.
Fransa hökuməti eyni zamanda süni intellekt sahəsinə 655 milyon avro investisiya yatırmağı planlaşdırır. Bu çərçivədə dövlət xidmətləri üçün vahid chatbot, Ameli dövlət tibbi sığorta sistemi üçün ictimai sağlamlıq chatbotu və dövlət məlumatlarına çıxışı asanlaşdıracaq yeni rəqəmsal platforma yaradılacaq.
