Finlandiyanın müdafiə və texnologiya şirkəti “Patria” Ukraynanın “General Cherry” brendi ilə tanınan “Center of Unmanned Technologies” şirkəti ilə Finlandiyada dron istehsalının təşkili istiqamətində əməkdaşlığa başlayıb.
MSNews.az xəbər verir ki, tərəflər avqustun 23-də niyyət protokolu (Letter of Intent) imzalayıblar. “Patria”nın rəsmi məlumatına görə, sənəd yekun istehsal müqaviləsi deyil, gələcək əməkdaşlığın çərçivəsini müəyyənləşdirir. Finlandiya şirkəti əməkdaşlıq çərçivəsində ölkədə dron istehsalına başlamağı planlaşdırır.
“General Cherry” zərbə təyinatlı FPV dronları, fiber-optik rabitə ilə idarə olunan PUA-lar, hava hədəflərini tutmaq üçün interceptor dronları və sabit qanadlı pilotsuz uçuş aparatlarının hazırlanması və seriyalı istehsalı üzrə ixtisaslaşıb. Şirkətin sistemləri Ukraynadakı real döyüş təcrübəsi və cəbhədən daxil olan rəylər əsasında təkmilləşdirilir.
“Patria” bildirir ki, əməkdaşlıq Ukrayna şirkətinin kiçik dronlar və döyüş şəraitində tətbiq üzrə təcrübəsini Finlandiya tərəfinin pilotsuz sistemlər, sensorlar, rabitə, süni intellekt və müdafiə sənayesi üzrə imkanları ilə birləşdirəcək. Tərəflər gələcəkdə Qərbi Avropa ölkələrinin müdafiə ehtiyacları üçün də yeni pilotsuz sistemlərin birgə hazırlanmasını nəzərdə tuturlar.
Razılaşma Finlandiya Prezidenti Aleksandr Stubbun Kiyevə səfəri zamanı əldə olunub. “Ukrainska Pravda” yazır ki, Stubbun rəhbərlik etdiyi nümayəndə heyətinə “Patria” ilə yanaşı “Insta”, “Boomeranger”, “Nokia”, “ICEYE”, “Sensofusion” və “NestAI” kimi Finlandiya şirkətlərinin nümayəndələri də daxil olub. Finlandiya və Ukrayna şirkətləri səfər zamanı müdafiə sənayesində bir sıra əməkdaşlıq sənədləri imzalayıblar.
Ukrayna Prezidenti Volodimir Zelenski bildirib ki, tərəflərin məqsədi Ukraynanın döyüş təcrübəsini Finlandiyanın texnoloji imkanları ilə birləşdirməkdir. İmzalanan sənədlər dronların Finlandiyada hazırlanması və istehsalı ilə yanaşı, dəniz pilotsuz sistemlərinin inkişafını və yerüstü robot komplekslərinin istehsalı üzrə əməkdaşlığı da əhatə edir.
“Patria” müdafiə sənayesində 100 ildən artıq təcrübəyə malikdir və quru, hava və dəniz platformaları üçün hərbi sistemlər hazırlayır. Şirkətin 50,1 faizi Finlandiya dövlətinə, 49,9 faizi isə Norveçin “Kongsberg Defence & Aerospace” şirkətinə məxsusdur.
Hələlik Finlandiyada dron istehsalının harada və nə vaxt başlanacağı, istehsal həcmi və investisiyanın məbləği açıqlanmayıb. Buna görə layihəni artıq fəaliyyətə başlamış istehsal müəssisəsi kimi deyil, tərəflərin həyata keçirməyə hazırlaşdığı sənaye əməkdaşlığı kimi qiymətləndirmək daha dəqiqdir.
