Çin, iflic olmuş şəxslərin əl hərəkətlərini qismən bərpa etməyə kömək edən beyin implantına ticari istifadə icazəsi verərək dünyada bir ilkə imza atıb.
“Neuracle Medical Technology” şirkətinin hazırladığı cihaz, beyin-kompüter interfeysi (BCI) texnologiyasını istifadə edir və bu sahədə verilən ilk kommersiya icazəsi kimi diqqət çəkir.
Texnologiya sayəsində istifadəçilər yalnız düşüncə gücü ilə kompüterdən istifadə edə və ya protez əli hərəkət etdirə bilirlər. Sistem beynin hərəkət niyyətini alqılayır, onu proqram vasitəsilə robot əlcəyə ötürür və hava təzyiqi ilə işləyən əlcək əlin açılıb-bağlanmasına kömək edir.
Cihaz hər kəs üçün uyğun deyil: 18-60 yaş arasında olan, ən az bir ildir iflic olmuş, üst qollarında hələ də hərəkət qabiliyyəti olan şəxslər üçün nəzərdə tutulub. Çin, BCI texnologiyasını milli strateji prioritetlər sırasına daxil edib və gələcək iqtisadi planlamasında bu sahəni böyümənin mühüm amili kimi görür.
Maraqlı fakt: Ötən il “Shanghai NeuroXess” şirkətinin beyin implantı, səkkiz ildir iflic olan 28 yaşlı bir xəstənin yalnız beş gün sonra düşüncə ilə cihazları idarə etməsinə imkan verərək beynəlxalq diqqət çəkmişdi. İlon Mask da “Neuralink” layihəsinin 2026-cı ildə BCI cihazlarının geniş istehsalına başlamasını planlaşdırdığını açıqlayıb.
