Din və mənəvi praktikalara bağlılıq insanın uzunömürlü olmasına müsbət təsir göstərə bilər. Bu nəticə ABŞ-nin Ohayo Universitetinin alimləri tərəfindən aparılan araşdırma zamanı ortaya çıxıb.
Tədqiqat çərçivəsində ABŞ-nin 42 ştatında yaşamış və vəfat etmiş mindən çox insanın nekroloqu təhlil edilib. Araşdırmanın nəticələrinə görə, dini inanclara sahib olan şəxslər dini inancı olmayan insanlarla müqayisədə orta hesabla 5,64 il daha uzun yaşayır.
Alimlər bu fərqi insanların həyat tərzi ilə əlaqələndirirlər. Mütəxəssislərin fikrincə, dua, meditasiya və yoqa kimi mənəvi praktikalara müraciət etmək stressin azalmasına, emosional gərginliyin idarə olunmasına və psixoloji tarazlığın qorunmasına kömək edir.
Araşdırma göstərir ki, mənəvi həyat tərzi və dini icmalarla sosial əlaqələr də insanın psixoloji vəziyyətinə müsbət təsir göstərərək sağlam və uzun ömür sürməsinə töhfə verə bilər.
