MSNews.az xəbər verir ki, viral paylaşımlarda “Kaiwa Technology” adlı Çin şirkətinin süni bətn yerləşdirilmiş insanabənzər robot hazırladığı iddia olunur. Bildirilir ki, robot mayalanmadan doğuşadək bütün prosesi həyata keçirəcək, ilk prototip 2026-cı ildə təqdim olunacaq və təxminən 100 min yuana satılacaq.
Ancaq layihənin mövcudluğunu təsdiqləyən prototip, elmi məqalə, patent, klinik sınaq və ya etibarlı rəsmi açıqlama yoxdur.
Universitet layihənin mövcudluğunu təkzib edib
Xəbərlərdə layihənin müəllifi kimi “Kaiwa Technology” şirkətinin rəhbəri və Sinqapurun Nanyanq Texnologiya Universitetinin doktorantı olduğu deyilən Zhang Qifeng adlı şəxs göstərilib.
Nanyanq Texnologiya Universiteti isə “Live Science” nəşrinə açıqlamasında bu adda şəxsin universitetdə doktorluq dərəcəsi almadığını və ali məktəbdə “hamiləlik robotu” ilə bağlı heç bir tədqiqat aparılmadığını bildirib. Nəşr, həmçinin, “Kaiwa Technology” şirkətinin fəaliyyətini təsdiqləyən etibarlı məlumat tapa bilmədiyini qeyd edib.
Mövzu ilə birlikdə yayılan, qarnında şəffaf süni bətn və insan dölü görünən robot təsvirlərinin də real prototip fotoşəkilləri olmadığı, süni intellektlə yaradıldığı müəyyənləşdirilib. Digər fakt-yoxlama materialları da 2026-cı ildə belə robotun təqdim olunacağı iddiasını saxta məlumat kimi qiymətləndirib.
Süni bətn texnologiyası həqiqətən mövcuddurmu?
Süni bətnlə bağlı real elmi tədqiqatlar aparılır, lakin onların məqsədi hamiləliyi mayalanmadan doğuşadək tamamilə insan bədənindən kənarda həyata keçirmək deyil.
Filadelfiya Uşaq Xəstəxanasının alimləri “EXTEND” adlı maye ilə doldurulmuş sistem hazırlayıblar. Sistem çox erkən doğulan körpələrin orqanlarının bir neçə həftə daha inkişaf etməsinə şərait yaratmaq məqsədi daşıyır.
Texnologiya indiyədək əsasən qoyun dölləri üzərində sınaqdan keçirilib. Tədqiqatçılar 23–24 həftəlik insan dölünün inkişaf mərhələsinə uyğun olan qoyun döllərini süni amniotik maye olan xüsusi qurğuda saxlayıblar.
Xəstəxana bildirir ki, sistemin gələcək məqsədi son dərəcə erkən doğulan körpələri təxminən 23-cü həftədən 28-ci həftəyədək dəstəkləməkdir. O, embrionu mayalanmadan başlayaraq doqquz ay daşımaq üçün nəzərdə tutulmayıb.
ABŞ Qida və Dərman Administrasiyasının süni bətn texnologiyası üzrə müzakirələri də yalnız 22-ci həftədən sonra doğulan son dərəcə vaxtından əvvəl körpələrin müalicəsini əhatə edib. İnsan hamiləliyini bütövlükdə əvəz edən robotdan söhbət getməyib.
Nəticə
Çində uşağı mayalanmadan doğuşadək daşıyacaq “hamiləlik robotu”nun hazırlanması barədə məlumat saxtadır.
Hazırda bu qabiliyyətə malik real robot, işlək prototip və ya təsdiqlənmiş elmi layihə yoxdur. Mövcud süni bətn tədqiqatları isə yalnız çox erkən doğulan körpələrin inkişafını məhdud müddətdə dəstəkləməyə yönəlib.
