Çində mobil telefonlar üçün “Love and Deepspace” adlı oyun milyonlarla insanın, xüsusilə qadınların diqqətini cəlb edib. Bu oyunda istifadəçilər bir neçə romantik personajdan öz “virtual sevgililərini” seçə və onlarla interaktiv münasibət qura bilirlər. Bu virtual münasibətlər son dövrdə çox populyarlaşaraq real həyatdakı emosional boşluqları doldurmağa başlayıb.
“Reuters“-in məlumatına görə, 33 yaşlı Jou adlı çinli bu oyunda “Qi Yu” adlı personajla altı aydır “əlaqədədir”. Qi Yu dalğalı saçlı, yaraşıqlı bir rəssam obrazıdır və əslində uydurma xarakterdir. Oyunun istifadəçilərdən biri kimi Jou öz üzünü və səsini daxil edərək virtual partnyoru ilə daha səmimi qarşılıqlı münasibət qurur.
“Love and Deepspace” 2024-cü ildə çıxıb və hazırda dünyada təxminən 80 milyon istifadəçisi var. Tədqiqat firması “Sensor Tower”-ə görə, oyun qlobal miqyasda böyük gəlir əldə edib və ümumi gəlirin təxminən 60 faizi Çinin hesabına düşür.
Oyun sadəcə romantik münasibət yaradan simulyasiya deyil, həm də əyləncə və fantaziya elementlərini birləşdirir. Jou oyunu gündə təxminən bir saat oynayır və artıq 10 min yuan (təxminən 1400 ABŞ dolları) xərcləyib – əsasən əlavə xüsusiyyətləri açmaq üçün.
Ekspertlərin fikrincə, bu cür “otome” janrına aid oyunların Çin bazarında yüksəlişi həm inkişaf etmiş oyun infrastrukturu, həm də qadınların maliyyə və emosional müstəqilliyinin artması ilə bağlıdır. Belə oyunlar qadınların hiss və ehtiyaclarını ön planda tutaraq onlara real həyatda yaşana bilməyən təcrübələr təklif edir.
Şanxayda yaşayan 31 yaşlı Evina Li də oyunun azarkeşlərindəndir; onun real həyatda sevgilisi olsa da, kişilər və qadınlar arasındakı qarşılıqlı əlaqədəki çatışmazlıqları oyun vasitəsilə hiss etdiyini deyir.
Jou bildirib ki, real həyatda da sevgili tapıb evlənməyi düşünür, lakin təlaş və stresdən uzaq bu virtual münasibətin ona emosional sabitlik verdiyini vurğulayır.
