“Reuters”-in 12 aprel tarixli məlumatına görə, Çin Tayvan üçün 10 yeni təşviq tədbiri elan edib. Paketə turizm məhdudiyyətlərinin yumşaldılması, Tayvan televiziya məhsullarının müəyyən şərtlərlə yayımlanmasına icazə verilməsi, ərzaq və balıqçılıq məhsullarının satışının asanlaşdırılması, həmçinin uçuşların bərpası kimi addımlar daxildir. Bu qərar Tayvanın əsas müxalifət partiyası Homindanın sədri Çenq Li-vunun Çinə səfərindən dərhal sonra açıqlanıb.
Pekinin elan etdiyi tədbirlər arasında Homindan ilə Çin Kommunist Partiyası arasında daimi əlaqə mexanizminin yaradılmasının araşdırılması, Tayvanla tam hava əlaqəsinin bərpası və Şanxayla Fuçjyan əyalətindən fərdi turistlərin yenidən Tayvana səfərinə icazə verilməsi də var. “Xinhua”-nın məlumatına görə, ərzaq və dəniz məhsulları üzrə yoxlama standartlarının yumşaldılması da nəzərdə tutulur, amma bu, “Tayvan müstəqilliyinə qarşı çıxmaq” siyasi şərti ilə əlaqələndirilir.
Tayvan hökuməti isə bu addımları sərt tənqid edib. Adanın Çin siyasətinə cavabdeh olan “Mainland Affairs Council” bildirib ki, Pekinin birtərəfli “güzəştləri” əslində “səxavətli hədiyyə paketi” kimi qablaşdırılmış zəhərli təkliflərdir. Qurum vurğulayıb ki, Tayvan hökuməti sağlam və nizamlı qarşılıqlı əlaqəni dəstəkləyir, lakin belə təmaslar siyasi ön şərtlərə bağlanmamalıdır.
Buna qarşılıq Homindan Çinin açıqlamasını Tayvan xalqı üçün “hədiyyə” kimi dəyərləndirib. “Reuters” yazır ki, Pekin hazırkı Tayvan prezidenti Lay Çinq-te ilə danışmaqdan imtina edir və onu “separatçı” adlandırır. Çinin bu yeni paketi də məhz, Pekinə daha açıq münasibət göstərən müxalifət liderinin səfərindən sonra elan olunub və bu addımın Tayvan daxilində siyasi mənası ayrıca müzakirə mövzusuna çevrilib.
Ümumən, yeni təşviq paketi Pekinin Tayvanla münasibətlərdə paralel xətt apardığını göstərir: bir tərəfdən iqtisadi və ictimai əlaqələr üçün cazibədar addımlar təklif olunur, digər tərəfdən isə bunlar açıq siyasi çərçivəyə bağlanır. Çin və Tayvan böyükmiqyaslı turizmin, bəzi idxal kanallarının və rəsmi əlaqələrin bərpası ilə bağlı uzun müddətdir bir-birini günahlandırır.
