Çin, Qobi çölündə inşa etdiyi və yaxın günlərdə fəaliyyətə başlaması planlaşdırılan nəhəng enerji stansiyası ilə yenilənə bilən enerji sahəsində diqqət çəkən bir layihəni işə salır.
Dünyanın ən böyük maye hava enerji saxlaması stansiyası olaraq təqdim edilən bu layihə ilə ildə 180 milyon kilovat/saat (kWh) elektrik istehsalı və enerji şəbəkəsinin balanslaşdırılması hədəflənir.
Kütləvi məlumatlarda “Super Soyuq Hava Batareyası” adı ilə tanınan stansiyanın yaxın vaxtlarda fəaliyyətə başlaması gözlənilir. Çin mediasının məlumatına görə, “Super Air Power Bank” adlı layihə həm texnoloji bazisi, həm də istehsal gücü ilə qlobal miqyasda önəm daşıyır.
Qobi çölündə yerləşən stansiya, xaricdən baxıldığında çoxsaylı ağ tanklardan ibarət görünür. Sistem çərçivəsində hava xüsusi avadanlıqlar vasitəsilə -194 °C-yə qədər soyudularaq maye halına gətirilir və saxlanılır. Saxlanmış maye hava nəzarətli şəkildə sərbəst buraxıldığında, həcmi 750 dəfədən çox genişlənir və yaranan enerji turbinləri fırladaraq elektrik istehsal edir.
Bu üsul sayəsində enerji, kimyəvi batareyalara ehtiyac olmadan tam fiziki proseslə saxlanır və tələb olunduqda yenidən elektrik şəbəkəsinə ötürülür.
Stansiyanın illik ümumi istehsal gücü 180 milyon kWh təşkil edir ki, bu da təxminən 30 min evin illik elektrik tələbatını ödəyə biləcək səviyyədədir.
