Sosial şəbəkələrdə süni intellektin adi fotoşəkildən rentgen görüntüsü hazırlayaraq həkimləri əvəz edə bildiyi barədə iddia yayılıb. Paylaşımlarda “ChatGPT” vasitəsilə bədənin ağrıyan hissəsinin təsvirini yaratmağın və tibbi rəy almağın mümkün olduğu bildirilir.
MSNews.az xəbər verir ki, yayılan iddiada qolunda güclü ağrı hiss edən bir gəncin “ChatGPT”-yə müraciət etdiyi, süni intellektin onun üçün rentgenə bənzər görüntü hazırlayaraq hər şeyin qaydasında olduğunu bildirdiyi qeyd olunur.
Bununla belə, həmin hadisənin orijinal paylaşımı və tibbi nəticələri müstəqil şəkildə təsdiqlənməyib.
Tibbi görüntüləmə sahəsində məlumat verən “RadiologyInfo” portalının izahına görə, rentgen müayinəsi xüsusi avadanlıq vasitəsilə ionlaşdırıcı şüaların bədəndən keçirilməsi əsasında aparılır. Bu üsul sümüklərin və bəzi daxili strukturların görüntüsünü əldə etməyə, sınıq və çıxıqlar kimi problemləri müəyyənləşdirməyə imkan verir.
Adi fotoşəkil isə bədənin daxili quruluşu haqqında belə məlumat daşımır. Süni intellekt həmin fotoya əsasən rentgenə oxşayan təsvir yarada bilsə də, görünməyən sümüklərin real vəziyyətini müəyyən edə bilməz. Yaradılan görüntüdəki detallar gerçək anatomik vəziyyəti əks etdirməyə bilər.
Bu səbəbdən “ChatGPT”-nin hazırladığı süni rentgen təsviri əsasında sınıq olmadığını söyləmək təhlükəli yanlış qiymətləndirməyə səbəb ola bilər.
“RadiologyInfo”nun məlumatına əsasən, həqiqi rentgen görüntülərinin təhlili xüsusi hazırlıq keçmiş radioloq tərəfindən aparılır. Bəzi zədələrin müəyyənləşdirilməsi üçün əlavə tibbi müayinələr də tələb oluna bilər.
Süni intellekt tibbdə real rentgen görüntülərinin təhlilinə kömək etmək üçün istifadə olunsa da, bu, adi fotoşəkildən etibarlı rentgen müayinəsi yaratmaqla eyni deyil.
