ABŞ vitse-prezidenti Cey Di Vens İranla danışıqlar aparmaq üçün İsveçrəyə gedib.
MSNews.az xəbər verir ki, “Associated Press” agentliyi ABŞ vitse-prezidenti və yüksək səviyyəli İran rəsmilərinin İsveçrənin Obbürgen bölgəsində yerləşən Bürgenştok kurortuna gəldiyini yazır.
Məlumata görə, danışıqlar Tehranın nüvə proqramı və ABŞ-İran arasında əldə olunan ilkin razılaşmanın texniki detallarının müəyyənləşdirilməsi məqsədi daşıyır. Tərəflərin qarşıdakı 60 gün ərzində yekun mexanizmlər üzərində işləməsi gözlənilir.
“Axios” yazır ki, Vens Vaşinqtondan yola düşməzdən əvvəl danışıqların əsas mövzularının İranın nüvə proqramı və Livanda atəşkəs məsələsi olacağını bildirib. O, prosesin “bir neçə gün” çəkəcəyini, özünün isə İsveçrədə “bir-iki gün” qalacağını deyib.
ABŞ nümayəndə heyətinə prezident Donald Trampın xüsusi nümayəndəsi Stiv Uitkoff və Cared Kuşner də daxildir. Onlar danışıqlara hazırlıq üçün Vensdən əvvəl İsveçrəyə gəliblər.
İran nümayəndə heyətinə xarici işlər naziri Abbas Araqçi və parlament sədri Məhəmməd Baqer Qalibafın daxil olduğu bildirilir. İran tərəfi danışıqlarda əsas diqqətin İsrail və “Hizbullah” arasında atəşkəsin təmin olunmasına yönələcəyini bəyan edib.
Pakistanın Baş naziri Şahbaz Şərif və ölkənin ordu rəhbəri Asim Munir də İsveçrəyə gəlib. “Associated Press” yazır ki, Vens əvvəlcə pakistanlı rəsmilərlə görüşüb. Pakistan və Qətər bu danışıqlarda əsas vasitəçilərdən biri kimi çıxış edir.
“Al Jazeera” bildirir ki, danışıqlarda Livan məsələsi xüsusi yer tutur. İran İsrailin Livandakı əməliyyatlarını və atəşkəsin pozulmasını ABŞ-İran razılaşmasının icrasına maneə kimi təqdim edir.
Danışıqlar regionda gərginliyin artdığı dövrdə başlayır. Tehran daha əvvəl Hörmüz boğazını bağladığını elan etmiş, ABŞ isə boğazdan kommersiya gəmiçiliyinin davam etdiyini bildirmişdi.
“Reuters” yazır ki, İsveçrə Xarici İşlər Nazirliyi Bürgenştokda ABŞ-İran Anlaşma Memorandumunun icrası ilə bağlı müzakirələr üçün “diskret və etibarlı məkan” təqdim etdiyini təsdiqləyib. Nazirlik danışıqların məzmunu və iştirakçılar barədə əlavə məlumat açıqlamayacağını bildirib.
Danışıqların nəticəsi həm İranın nüvə proqramının gələcəyi, həm də Livanda atəşkəsin davamlılığı baxımından mühüm hesab olunur. Lakin tərəflər arasında etimadsızlıq və regiondakı hərbi gərginlik prosesin uğurunu sual altında saxlayır.
