Ukrayna Prezident Ofisinin rəhbəri, keçmiş hərbi kəşfiyyat rəhbəri Kiril Budanov Rusiya ilə mümkün danışıqlarda ərazi güzəştlərinin Kiyev üçün qəbuledilməz olduğunu bildirib.
MSNews.az xəbər verir ki, Budanov “RBC-Ukraina”ya müsahibəsində Ukraynanın sərhədləri və əraziləri ilə bağlı kompromislərin “prinsipcə mümkün olmadığını” deyib. O bildirib ki, müharibənin taleyi həm döyüş meydanında, həm də danışıqlar masasında birlikdə müəyyənləşəcək.
“Ukrainian News”un məlumatına görə, Budanov müharibənin hazırda eskalasiya mərhələsinə daxil olduğunu və bu mərhələdən çıxış üçün gərginliyin pik həddə çatmasından sonra deeskalasiya və dialoqa qayıdışın mümkün ola biləcəyini bildirib. O, danışıqlar nəticə verməsə, Ukraynanın müharibəni illərlə davam etdirməyə hazır olduğunu da qeyd edib.
Budanov Belarus istiqamətindən hazırda ciddi hərbi təhlükə görmədiyini də deyib. “The New Voice of Ukraine” yazır ki, onun sözlərinə görə, Kiyev Minsklə yeni cəbhə açmaqda maraqlı deyil və Belarusun müharibəyə birbaşa qoşulması bu ölkə üçün ağır nəticələr yarada bilər.
Müsahibədə Krım istiqaməti də əsas mövzulardan biri olub. Budanov bildirib ki, Ukraynanın prioritetlərindən biri Rusiyanın cənub istiqamətindəki hərbi logistikasını zəiflətmək, xüsusilə işğal altındakı Krımı təmin edən marşrutları kəsməkdir. Onun sözlərinə görə, Kiyevin istehsal imkanlarının artması bu istiqamətdə zərbələrin intensivliyini yüksəltməyə şərait yaradıb.
Budanov ABŞ amilinə də toxunaraq bildirib ki, Vaşinqtonun dəstəyinin davam etməsi üçün Ukrayna döyüş meydanında real nəticələr göstərməlidir. Onun fikrincə, ABŞ-dakı siyasi proseslər vacib olsa da, əsas məsələ Ukraynanın nəticə əldə etməsidir.
