Böyük Britaniyada çay və göllərdə yaşayan bütün qu quşuları hüquqi baxımdan monarxa məxsus hesab olunur. Bu maraqlı və nadir qayda XIII əsrdən etibarən qüvvədədir və bu günə qədər öz əhəmiyyətini qoruyub saxlayır.
Tarixi mənbələrə görə, orta əsrlərdə qu quşuları kral süfrələrinin əsas yeməklərindən biri olduğu üçün onların ovlanması və hazırlanması yalnız kraliça tərəfindən xüsusi icazə verilmiş şəxslərə mümkün idi. Sonrakı dövrlərdə bu imtiyaz şərab tacirləri və boyaqçılar kimi müəyyən peşə sahiblərinə də verilib.
Qu quşularının kimə məxsus olduğunu müəyyən etmək üçün zamanla xüsusi işarələmə sistemi yaradılıb. Bu sistemə əsasən, qu quşularının dimdiyi üzərində müxtəlif nişanələr çəkilir və həmin işarələr onların hansı quruma və ya şəxsə aid olduğunu göstərir. Tarixi qeydlərdə, o cümlədən Uilyam Yarellanın 1843-cü ildə nəşr olunan “Böyük Britaniya quşlarının tarixi” adlı əsərində bu işarələrin nümunələri ətraflı təsvir olunub. Qanuna görə, əgər qu quşunun dimdiyində heç bir nişan yoxdursa, o avtomatik olaraq kraliçanın mülkiyyəti sayılır.
Bu ənənə bu gün də yaşadılır. Hər il iyul ayında Temza çayında “qu quşularının inventarlaşdırılması” adlanan rəsmi mərasim keçirilir. Bu tədbir zamanı qırmızı və göy rəngli köynəklər, ağ şalvar geymiş avarçəkənlər çaya enərək qu quşularını yoxlayır, onların sağlamlıq vəziyyətini araşdırır, xəstə və ya zədəli olanları qeydiyyata alırlar. Araşdırmalar qanunla müəyyən edilmiş Temza hissələrində və onun qollarında aparılır və bu proses Böyük Britaniyanın ən qədim krallıq ənənələrindən biri hesab olunur.
