Portuqaliya millisinin və “Mançester Siti”nin yarımmüdafiəçisi Bernardo Silva yay transfer pəncərəsi ərəfəsində “Real Madrid”ə təklif olunub. İspaniyanın “AS” nəşrinin məlumatına görə, 31 yaşlı futbolçu yeni klub axtarır və gələcəyi ilə bağlı hələlik bilinən əsas məqam onun “Barselona”nın təklifini rədd etməsidir.
Nəşr yazır ki, Bernardo Silvanın “Real Madrid”ə təklif olunması Joşko Qvardiolun Madrid klubuna təqdim edilməsi fonunda gündəmə gəlib. Nəşr qeyd edir ki, “Real Madrid”də Xose Mourinyonun baş məşqçi postuna mümkün gəlişi klubun transfer strategiyasında dəyişiklik yarada bilər.
Bununla belə, Mourinyonun “Real Madrid”ə qayıdışı hələ rəsmiləşməyib. Portuqaliyalı mütəxəssis “Real Madrid”lə danışıqlar fonunda gələcəyi ilə bağlı qərarını yaxın günlərdə verəcəyini bildirib. O, agentinin Madrid klubu ilə təmasda olduğunu təsdiqləsə də, rəsmi təklif almadığını deyib.
Bernardo Silva 2017-ci ildən “Mançester Siti”də çıxış edir. İngiltərə klubunun rəsmi məlumatına görə, futbolçu 2023-cü ildə imzaladığı müqavilə ilə 2026-cı ilin yayına qədər komandada qalmalı idi. Bu səbəbdən portuqaliyalı oyunçu yayda azad agent kimi klubdan ayrıla bilər.
