Belçika millisi dünya çempionatının “G” qrupunda İranla qolsuz heç-heçə edib.
MSNews.az xəbər verir ki, Belçika və İran arasında Los-Ancelesdə keçirilən görüş 0:0 hesabı ilə başa çatıb. Bu nəticədən sonra hər iki komanda qrupdakı ikinci oyununu da heç-heçə ilə tamamlayıb.
Matçın ən diqqətçəkən epizodlarından biri Mehdi Tareminin birinci hissədə vurduğu qolun VAR yoxlamasından sonra ofsayd səbəbindən ləğv edilməsi olub. Oyun ərzində İran müdafiədə intizamlı oyun nümayiş etdirmiş, Belçikanın isə üstünlüyü qola çevirə bilməyib.
Belçika yığması ikinci hissədə çətin vəziyyətə düşüb. Natan Nqoy Mehdi Taremini saxladığı epizoddan sonra qırmızı vərəqə alıb və Avropa təmsilçisi matçı azlıqda davam etdirib.
Belçika qrupdakı ilk oyununda Misirlə 1:1, İran isə Yeni Zelandiya ilə 2:2 hesablı heç-heçə etmişdi. Bu səbəbdən “G” qrupunda mübarizə növbəti turun nəticələrindən sonra daha da gərginləşə bilər.
