Birləşmiş Ərəb Əmirliklərinin İran ərazisində yerləşən su infrastrukturuna zərbə endirdiyi barədə məlumat yayılıb.
Bu barədə MSNews.az İsrailin “Ynet” nəşrinə istinadən xəbər verir.
“Ynet” agentliyinin məlumatına görə, Birləşmiş Ərəb Əmirlikləri İranın dəniz suyunu şirinləşdirən qurğularından birinə zərbə endirib.
Məlumata əsasən, hücum İranın su təminatında mühüm rol oynayan duzsuzlaşdırma infrastrukturunu hədəf alıb. Hadisə ilə bağlı rəsmi Tehran və ya Abu-Dabi tərəfindən hələlik açıqlama verilməyib.
İsraildə bəzi ekspertlər bu addımı İran hakimiyyətinə yönəlmiş xəbərdarlıq siqnalı kimi qiymətləndirirlər. Onların fikrincə, əgər İranın hücumları daha da intensivləşərsə, BƏƏ-nin ABŞ və İsraillə birlikdə formalaşan koalisiya tərəfində münaqişəyə qoşulması ehtimalı artır.
Analitiklər qeyd edirlər ki, Körfəz regionunda su infrastrukturu strateji obyekt hesab olunur və bu cür zərbələr regionda gərginliyin daha da artmasına səbəb ola bilər.
