Azərbaycanda zabitlərin dinc dövrdə həqiqi hərbi xidmət müddəti 6 ay azaldılıb. Bununla bağlı Prezident İlham Əliyev “Hərbi xidmətkeçmə haqqında” Əsasnamənin təsdiq edilməsi barədə” və “Hərbi vəzifə və hərbi xidmət haqqında” qanunlarda dəyişiklikləri təsdiqləyib.
Dəyişikliklərə əsasən, ehtiyatdan müddətli həqiqi hərbi xidmətə çağırılan və ya bağlaşma əsasında könüllü olaraq həqiqi hərbi xidmətə daxil olan zabitlərin dinc dövrdə xidmət müddəti 1 il müəyyən edilib. Qeyd edək ki, indiyədək bu müddət 1 il 6 ay təşkil edirdi.
Qanunda edilən yeniliklər zabit hazırlığı mexanizmini də əhatə edir. Belə ki, müddətli həqiqi hərbi xidmət dövründə zabit hazırlığı kursunu müvəffəqiyyətlə bitirərək zabitlərin həqiqi hərbi xidmətinə könüllü daxil olan ali təhsilli hərbi qulluqçulara leytenant hərbi rütbəsi veriləcək.
Yeni dəyişikliklərin məqsədi hərbi xidmət sisteminin daha çevik və effektiv təşkilini təmin etmək, həmçinin peşəkar zabit heyətinin formalaşdırılmasını stimullaşdırmaqdır.
