Azərbaycanda 100-dən artıq dövlət domeni genişmiqyaslı kiberhücumun hədəfinə çevrilib. Xarici haker qruplaşması tərəfindən həyata keçirildiyi bildirilən hücum nəticəsində bir sıra dövlət qurumlarının rəsmi internet saytlarının fəaliyyətində fasilələr yaranıb.
MSNews.az xəbər verir ki, bu barədə Xüsusi Rabitə və İnformasiya Təhlükəsizliyi Dövlət Xidməti açıqlama yayıb.
Bildirilib ki, oktyabrın 13-də saat 22:00 radələrindən etibarən Azərbaycanın dövlət informasiya infrastrukturuna qarşı kiberhücum fəaliyyətləri qeydə alınıb.
Məlumata əsasən, hücum xarici haker qruplaşması tərəfindən həyata keçirilib və 100-dən artıq dövlət domeni hədəfə alınıb.
Kiberhücum nəticəsində bəzi dövlət orqanlarının internet informasiya ehtiyatlarının fəaliyyətində müvəqqəti fasilələr yaranıb.
Xüsusi Rabitə və İnformasiya Təhlükəsizliyi Dövlət Xidmətinin açıqlamasında qeyd olunub ki, görülən operativ texniki tədbirlər nəticəsində hücumun təsirləri məhdudlaşdırılıb və internet saytlarının fəaliyyətinin davamlılığı təmin edilib.
Dövlət Xidməti ölkənin dövlət informasiya sistemlərinin kibertəhdidlərdən qorunması, hücumların aşkarlanması və nəticələrinin aradan qaldırılması üzrə səlahiyyətli qurumdur.
Hücumun arxasında hansı haker qruplaşmasının dayandığı, konkret hansı dövlət saytlarının hədəfə alındığı və hər hansı məlumat sızmasının baş verib-vermədiyi barədə əlavə təfərrüatlar açıqlanmayıb.
Qeyd edək ki, 100-dən artıq domenin hədəfə alınması həmin sayda dövlət qurumunun informasiya sisteminə müdaxilə edildiyi və ya məxfi məlumatların ələ keçirildiyi anlamına gəlmir.
