Azərbaycan milli futbol komandası UEFA Millətlər Liqasının qrup mərhələsində Litvanı 1:0 hesabı ilə məğlub edərək vacib qələbə qazanıb.
MSNews.az xəbər verir ki, “D” Liqasının 2-ci qrupunda keçirilən qarşılaşmada yeganə qol 25-ci dəqiqədə vurulub. Abdulla Xaybullayev Tural Bayramovun ötürməsindən sonra rəqib qapısına yol taparaq millimizi hesabda önə keçirib.
Qarşılaşmanın ikinci hissəsində də hesab dəyişməyib və Azərbaycan yığması meydanı 1:0 hesablı qələbə ilə tərk edib.
Matçın diqqətçəkən epizodlarından biri ikinci hissədə yaşanıb. Xaybullayev ikinci sarı vərəqə ilə meydandan qovulsa da, VAR müdaxiləsindən sonra baş hakim qərarını dəyişib.
Bu nəticədən sonra Azərbaycan millisinin xallarının sayı 5-ə yüksəlib və komanda qrupda liderliyə qalxıb. Litvanın 4, Lixtenşteynin isə 1 xalı var.
Azərbaycan yığması Millətlər Liqasındakı növbəti oyununu noyabrın 13-də səfərdə Lixtenşteynə qarşı keçirəcək.
