Azərbaycan Respublikası ilə Əlcəzair Xalq Demokratik Respublikası arasında ticarət və iqtisadi əlaqələrin inkişafı məqsədilə mühüm hüquqi sənəd təsdiq edilib. Prezident İlham Əliyevin imzaladığı Fərmana əsasən, iki ölkə hökuməti arasında ticarət, iqtisadi, elmi və texniki əməkdaşlıq üzrə Birgə Komissiyanın yaradılması haqqında Saziş ratifikasiya olunub.
Saziş 2025-ci il noyabrın 4-də Əlcəzair şəhərində imzalanıb və Azərbaycan–Əlcəzair münasibətlərinin institusional əsasda inkişafına xidmət edir. Birgə Komissiya qarşılıqlı ticarət əlaqələrinin genişləndirilməsi, investisiya imkanlarının təşviqi, elmi və texniki əməkdaşlığın gücləndirilməsi üçün platforma rolunu oynayacaq.
Fərmana əsasən, Saziş qüvvəyə mindikdən sonra onun müddəalarının icrası Azərbaycan Respublikasının Nazirlər Kabineti tərəfindən təmin ediləcək. Xarici İşlər Nazirliyinə isə Sazişin qüvvəyə minməsi üçün zəruri dövlətdaxili prosedurların tamamlanması barədə Əlcəzair tərəfinə rəsmi bildiriş göndərilməsi tapşırılıb.
Bu addım Azərbaycanla Əlcəzair arasında ikitərəfli əməkdaşlığın yeni mərhələyə keçməsinə imkan yaradacaq.
