KİV-in məlumatına görə, Apple şirkəti Alphabet-in (Google-un ana şirkəti) süni intellekt modeli Gemini-dən istifadə etmək üçün razılaşmaya yaxındır. İddialara görə, Apple Google-a hər il təxminən 1 milyard ABŞ dolları həcmində ödəniş etməyi planlaşdırır.
Məlumata əsasən, söhbət “Siri” səsli köməkçisinin inkişaf etdirilməsi üçün Gemini modelinin xüsusi versiyasına lisenziya verilməsindən gedir. Bu model “Siri”-yə tapşırıqların planlaşdırılması, məlumatların qısa məzmununun hazırlanması kimi funksiyalarda dəstək olacaq.
Bununla belə, Apple bütünlüklə Google İA sisteminə keçmir – şirkət özünün hazırladığı süni intellekt modellərindən istifadəni davam etdirəcək. Gemini isə yalnız müəyyən əlavə funksiyaların işlənməsi üçün tətbiq olunacaq.
Razılaşmanın detalları hələ ki, Apple və Google tərəfindən rəsmi olaraq təsdiqlənməyib. Şirkətlərin yaxın zamanda bu mövzuda açıqlama verəcəyi gözlənilir.
