Böyük Britaniyada aparılan araşdırma ana bətnində körpələrin niyə təpik atdığı və ətrafları ilə ananın qarnına təmas etdiyi barədə yeni elmi izah təqdim edib. University College London və UCLH mütəxəssislərinin araşdırmasına görə, hamiləliyin son mərhələlərində — xüsusilə üçüncü trimestrdə — dölün hərəkətləri onun beynində bədənini “xəritələndirməyə” kömək edə bilər. Bu proses körpənin öz bədənini hiss etməsi və doğulduqdan sonra ətraf mühiti tanımağa hazırlaşması baxımından mühüm sayılır.
Araşdırma çərçivəsində orta hesabla iki günlük olan 19 yeni doğulmuş körpənin yuxu zamanı beyin dalğaları elektroensefaloqrafiya, yəni EEG vasitəsilə ölçülüb. Tədqiqatçılar körpələrin REM yuxusu zamanı əllərini və ayaqlarını hərəkət etdirdikdə beynin həmin bədən hissəsi ilə bağlı sahəsində sürətli beyin dalğalarının yarandığını müşahidə ediblər. Məsələn, sağ əlin hərəkəti sol beyin yarımkürəsində toxunma ilə bağlı sahəni aktivləşdirib.
Alimlərin fikrincə, bu nəticələr ana bətnindəki hərəkətlərin təsadüfi olmadığını göstərir. Dölün təpikləri və digər spontan hərəkətləri beyində sensor məlumatları emal edən sahələrin inkişafına yardım edir və körpənin “bu mənim əlimdir”, “bu mənim ayağımdır” kimi ilkin bədən hissi formalaşdırmasına şərait yaradır. UCL-in məlumatına görə, bu cür sürətli beyin dalğaları körpə bir neçə həftəlik olduqdan sonra tədricən yox olur.
Araşdırma müəlliflərindən doktor Lorenzo Fabrizi bildirib ki, erkən inkişaf dövründə spontan hərəkət və həmin hərəkətdən gələn sensor geribildirim heyvanlarda düzgün beyin xəritəsinin formalaşması üçün vacibdir və bu tədqiqat həmin mexanizmin insanlarda da mövcud ola biləcəyini göstərir. Tədqiqatçılar bu nəticələrin xüsusilə vaxtından əvvəl doğulan körpələr üçün xəstəxana mühitinin düzgün qurulması baxımından əhəmiyyət daşıdığını qeyd edirlər.
Mütəxəssislər vurğulayırlar ki, yeni doğulmuş körpələrin yuxusu mümkün qədər qorunmalıdır. Çünki müşahidə olunan hərəkətlər məhz, yuxu zamanı baş verir və lazımsız tibbi müdaxilələrin minimuma endirilməsi körpənin erkən beyin inkişafı üçün faydalı ola bilər.
