Almaniyada məşhur ağrı kəsici “Gelonida”, istehsalçı firma “Pfizer”in lisenziya hüquqlarından imtina etməsi səbəbindən ölkə üzrə bütün apteklərdən geri çağırılır.
Dərman parasetamol və kodein kombinasiyasından ibarət olub və bütün partiya nömrələri və qablaşdırma ölçülərini əhatə edir. Bu qərar xüsusilə kodeinin opioid qrupuna aid olması və yaratdığı asılılıq riski ilə bağlı təhlükəsizlik narahatlıqları artdıqdan sonra qəbul olunub.
Avropa Dərman Agentliyinin (EMA) 2025-ci ilin noyabrında verdiyi qərara əsasən, parasetamol və kodein tərkibli dərmanların prospektlərində asılılıq yaratma risklərinə dair açıq xəbərdarlıqlar əlavə edilməlidir. Klinik araşdırmalar göstərir ki, bu dərmanların uzun müddət istifadəsi tənəffüs basqısı, yuxu zamanı nəfəsin müvəqqəti dayanması və ya nəfəsin kifayət qədər dərin olmaması, ağrı həssaslığının artması və öd yollarında funksional pozğunluqlara səbəb ola bilər.
Mütəxəssislər, dərmanı istifadə edən xəstələrin müalicəni birdən dayandırmaq əvəzinə həkimlə məsləhətləşərək alternativ üsullara keçməsini tövsiyə edir. Apteklərin isə stokdakı məhsulları tez bir zamanda geri göndərməsi gözlənilir.
