Albaniyada hökumət əleyhinə keçirilən növbəti etiraz aksiyası zorakılıqla müşayiət olunub. Paytaxt Tirana şəhərində minlərlə müxalifət tərəfdarının qatıldığı aksiyada etirazçılar baş nazir Edi Ramanın ofisinin yerləşdiyi hökumət binasına “Molotov kokteylləri”, fişənglər və digər pirotexniki vasitələr atıblar. Polis buna cavab olaraq gözyaşardıcı qaz və su şırnaqlarından istifadə edib.
Hadisələr təkcə baş nazirin ofisi ilə məhdudlaşmayıb. Yerli və beynəlxalq mediaya görə, etirazçılar Tirana bələdiyyəsinin binasını, bir neçə nazirliyi, AKSHI binasını və hakim Sosialist Partiyasının qərargahını da hədəfə alıblar. Qarşıdurmalar şəhərin mərkəzində bir neçə nöqtəyə yayılıb.
Etirazlar ölkədə korrupsiya ittihamları və hökumətin istefası tələbi fonunda müxalif Demokrat Partiyasının çağırışı ilə keçirilib. Müxalifət Albaniyada “diktatura” və “narkodövlət” formalaşdığını iddia edir, hakimiyyət isə bu ittihamları rədd edir. “Reuters” və “AP” daha əvvəl də oxşar aksiyaların son aylarda bir neçə dəfə zorakılığa çevrildiyini yazıb.
Yaralılarla bağlı fərqli məlumatlar verilir. “AP” fevral aksiyası zamanı həm polis əməkdaşları, həm də etirazçılar arasında xəsarət alanların olduğunu bildirmişdi. Son aksiya ilə bağlı da yerli media yaralananların olduğunu yazır, amma dəqiq rəsmi yekun say hələ açıq şəkildə təsdiqlənməyib.
