Avropa İttifaqı Komissiyası bəyan edib ki, Avropa iştirak etmədən Ukrayna ilə bağlı hər hansı qərarın qəbul edilməsi mümkün deyil. Qurumun Xarici Əlaqələr üzrə sözçüsü Anuar Əl Anouni Brüsseldə keçirilən gündəlik mətbuat konfransında jurnalistlərin suallarını cavablandırarkən bu mövqeni açıq şəkildə ifadə edib.
Əl Anouni ABŞ-ın Rusiya-Ukrayna müharibəsinin dayandırılması istiqamətində göstərdiyi diplomatik səyləri müsbət qiymətləndirdiklərini bildirib. Onun sözlərinə görə, beynəlxalq sərhədlər zorla dəyişdirilməməlidir və bu prinsip beynəlxalq hüququn əsasını təşkil edir.
17–18 fevral tarixlərində Cenevrə şəhərində ABŞ, Rusiya və Ukrayna nümayəndələrinin iştirakı ilə keçirilən görüşlərə toxunan sözçü qeyd edib ki, Avropa İttifaqı və üzv dövlətlər sülh danışıqlarına və təhlükəsizlik zəmanətlərinə daha çox töhfə verməyə hazırdır.
Əl Anouni Ukraynadan fərqli olaraq Rusiyadan sülh istiqamətində konkret siqnallar görmədiklərini də vurğulayıb. ABŞ-Ukrayna-Rusiya formatında keçirilən üçtərəfli danışıqlardan razı olub-olmadıqları ilə bağlı suala cavab verən sözçü, “Avropa masa arxasında olmadan Ukrayna haqqında heç bir qərar qəbul edilə bilməz. Bu, son dərəcə aydındır” deyə bildirib.
Açıqlama Avropa İttifaqının Ukrayna məsələsində birbaşa tərəf kimi iştirak etməkdə israrlı olduğunu bir daha nümayiş etdirir.
