ABŞ Sahil Mühafizəsi tərəfindən təqib olunan “Bella 1” adlı neft tankerinin ekipajı Karib dənizində diqqətçəkən addım atıb. “The New York Times” qəzetinin ABŞ-dan olan iki rəsmi mənbəyə istinadən 30 dekabrda yaydığı məlumata görə, tanker heyəti gəminin gövdəsinə Rusiya bayrağını çəkərək ABŞ qüvvələrindən yayınmağa çalışıb.
Məlumata əsasən, ekipaj bu addımı atmaqla guya Rusiyanın himayəsini əldə etmək niyyəti güdüb. “NYT” yazır ki, bu vizual jest açıq şəkildə ABŞ qüvvələrinə siyasi və hüquqi siqnal göndərmək məqsədi daşıyıb.
Bu hadisə 21 dekabrda ABŞ Sahil Mühafizəsinin Karib dənizində “Bella 1” adlı tankeri Venesuelaya neft götürmək üçün hərəkət edərkən ələ keçirməyə cəhd etməsindən sonra başlayan qeyri-adi prosesin son mərhələsi kimi qiymətləndirilir. Gəmi ABŞ Prezidenti Donald Trampın Venesuela hökumətinin əsas iqtisadi dayağı olan neft sektoruna qarşı tətbiq etdiyi faktiki blokada siyasətinin hədəfinə düşüb.
ABŞ rəsmilərinin bildirdiyinə görə, tanker ekipajı qaçış zamanı gəminin yan hissəsinə Rusiya bayrağı çəkib və hazırda Rusiya himayəsi iddiası irəli sürür. Mənbələr əməliyyatın həssas xarakter daşıması səbəbindən anonim qalmağı üstün tutublar.
Qeyd edək ki, “Bella 1” ötən ildən ABŞ sanksiyaları altındadır. Federal qurumların məlumatına görə, tanker İran neftinin daşınmasında iştirak edib və bu gəlirlər terrorçuluğun maliyyələşdirilməsinə yönəldilib.
Rəsmilər həmçinin bildiriblər ki, tanker son vaxtlar marşrutunu dəyişərək şimal-qərb istiqamətinə — Qrenlandiya və ya İslandiya istiqamətində hərəkət edə bilər. Hazırda gəminin yük daşımadığı güman edilir. 17 dekabrdan bəri “Bella 1”-in yerləşmə transponderi söndürülüb və bu səbəbdən onun dəqiq mövqeyini izləmək mümkün deyil.
Ağ Ev, Pentaqon və Daxili Təhlükəsizlik Nazirliyi məsələ ilə bağlı rəsmi şərh verməkdən imtina edib. Vaşinqtondakı Rusiya səfirliyi də sorğulara cavab verməyib.
ABŞ rəsmilərinin sözlərinə görə, Sahil Mühafizəsi tankeri etibarlı milli bayraq daşımadığı üçün beynəlxalq hüquqa əsasən yoxlamaq istəyib. Lakin gəmi əmrlərə tabe olmayaraq yoluna davam edib və o vaxtdan bəri ABŞ qüvvələri tərəfindən izlənilir.
Rəsmən izah edilməsə də, “Bella 1”-in ələ keçirilməsi üçün xüsusi təlim keçmiş bordinq qrupuna ehtiyac var. Mülki tankerlərin bu cür əməliyyatlardan qaçması nadir haldır. Bu ay Venesuela yaxınlığında saxlanılan digər iki tanker isə yoxlamaya razılaşıb.
ABŞ artıq İran, Rusiya və Venesuelaya məxsus neftin sanksiyaları pozaraq daşınması ilə məşğul olan “kölgə donanması”na qarşı daha sərt tədbirlər planlaşdırır. “Bella 1”-in ekipajının əsasən Rusiya, Hindistan və Ukrayna vətəndaşlarından ibarət olduğu bildirilir.
Bu arada, ABŞ Maliyyə Nazirliyi Venesuela və İranla əlaqəli pilotsuz uçuş aparatlarının istehsalı və satışında iştirak edən 10 şəxs və quruma qarşı yeni sanksiyalar elan edib. Nazirlik həmçinin Venesuelada dronların yığılmasında iştirak edən dövlət şirkətinin rəhbərini də hədəfə alıb.
