Venesuelanın paytaxtı Karakasda bu gecə saat təxminən 02:00 radələrində ən az yeddi güclü partlayış səsləri eşidilib və şəhər sakinləri panika içində küçələrə axışıb. Şahidlərin verdiyi məlumata görə, alçaqdan uçan hərbi təyyarələrin səsi də şəhər boyunca eşidilib.
Amerika Birləşmiş Ştatları ordusu Venesuelaya genişmiqyaslı hərbi zərbələr endirdiyini açıqlayıb. ABŞ Prezidenti Donald Tramp sosial mediada verdiyi bəyanatda bildirib ki, əməliyyat nəticəsində Venesuela Prezidenti Nikolas Maduro və onun həyat yoldaşı Silia Flores “tutularaq ölkədən çıxarılıb”.
CBS və digər xarici mətbuat qurumlarının xəbərinə görə, əmr Donald Tramp tərəfindən verilib və ABŞ qüvvələri Venesueladakı hərbi obyektləri, o cümlədən Karakas yaxınlığındakı strateji nöqtələri hədəf alıb. Eyni zamanda, elektrik enerjisi kəsintiləri və müxtəlif ərazilərdə partlayışlar qeydə alınıb.
Venesuela hökuməti bu hadisəni “ABŞ-nin hərbi hücumu” kimi qəti şəkildə pisləyib və ölkədə fövqəladə hal elan edib. Rəsmi Karakas, ABŞ-ı beynəlxalq hüququn pozulmasında ittiham edib və vətəndaşları səfərbər olmağa çağırıb.
Hadisə ilə bağlı beynəlxalq reaksiya da gəlib: İran və digər bəzi ölkələr ABŞ-ın hərbi əməliyyatlarını sərt şəkildə qınayıb, BMT Təhlükəsizlik Şurasının dərhal toplanmasını tələb ediblər.
Hazırda vəziyyət qeyri-müəyyən olaraq qalır: dünya hökumətləri, ABŞ və Venesuela arasında münasibətlərin gələcək gedişatı ilə bağlı açıqlama verirlər, lakin tam təsdiqlənmiş məlumatlar hələ də məhduddur.
