İran ərazisindəki hədəflərə mümkün zərbələrin endirilməsi məqsədilə ABŞ və İsrailin ölkə yaxınlığında yerləşdirdiyi mövcud hərbi potensialın qiymətləndirilməsi aparılıb və nəticələrə görə, tərəflərin qısamüddətli, lakin son dərəcə güclü hava-raket əməliyyatı həyata keçirmək üçün kifayət qədər resursa malik olduğu bildirilir.
Yaxın Şərqə göndərilən təyyarələrin əhəmiyyətli hissəsini ənənəvi olaraq yanacaqdolduran təyyarələr təşkil edir və hazırda ABŞ-ın təxminən 20, İsrailin isə 13 belə hava tankeri uzaqmənzilli zərbə aviasiyasının fəaliyyətini təmin etmək üçün hazır vəziyyətdədir.
İranın bilavasitə yaxınlığında ABŞ Hərbi Hava Qüvvələrinə məxsus 37 ədəd “F-15E Strike Eagle” zərbə təyyarəsi yerləşdirilib, bölgəyə çatan “USS Abraham Lincoln” aviadaşıyıcısının aviaqrupunda isə təxminən 10 ədəd “F-35C Lightning II” və “F/A-18E/F Super Hornet” göyərtə qırıcısı xidmətə hazır saxlanılır.
İsrail Hərbi Hava Qüvvələrinin arsenalında 48 ədəd “F-35I Adir”, 173 ədəd müxtəlif modifikasiyalı “F-16” və 66 ədəd “F-15” qırıcısı mövcuddur ki, bu da genişmiqyaslı hava kampaniyası aparmaq üçün kifayət qədər böyük qüvvə hesab olunur.
Bundan əlavə, Böyük Britaniyadakı aviabazalarda yerləşdirilən 35 ədəd “F-15E” və 54 ədəd “F-35A” qırıcısının 16 ədəd “KC-135” yanacaqdolduran təyyarənin müşayiəti ilə operativ şəkildə Yaxın Şərqə köçürülə biləcəyi qeyd olunur.
Bölgədə yerləşdirilmiş 24 ədəd “A-10C Thunderbolt II” hücum təyyarəsinin isə birbaşa zərbə funksiyasından daha çox “APKWS II” raketləri ilə dronlara qarşı istifadə ediləcəyi ehtimal edilir.
Təhlildə əməliyyatın yeganə zəif cəhəti kimi uzaqmənzilli radiolokasiya aşkaretmə təyyarələrinin sayının məhdud olması göstərilir, lakin bu boşluğun sonradan əlavə qüvvələr hesabına aradan qaldırıla biləcəyi istisna edilmir.
Mütəxəssislərin qənaətinə görə, hazırkı mərhələdə ABŞ və İsrail qruplaşmaları İranın effektiv şəkildə qarşısını ala bilməyəcəyi intensiv və qısamüddətli hava-raket zərbələri endirmək imkanına malikdir və əvvəlki qarşıdurmalarda İranın HHM sistemlərinin zəifliyi bu ssenarini daha da real edir.
Nəticə etibarilə, mümkün əməliyyatın miqyası və davametmə müddəti birbaşa ABŞ prezidenti Donald Trampın nə qədər qüvvə ayırmağa və prosesdə nə qədər uzun müddət iştirak etməyə hazır olmasından asılı olacaq, lakin Yaxın Şərqdə cəmləşdirilən mövcud hərbi qruplaşmanın gücü potensial zərbələr üçün artıq kifayət hesab olunur.
