ABŞ İranla əlaqələndirilən “Handala Hack Team” adlı haker qrupuna qarşı təzyiqi artırıb.
“Reuters”-in yaydığı məlumata görə, qrup FTB direktoru Kaş Patelin şəxsi e-poçt hesabını sındırdığını iddia edib və internetdə ona aid fotoşəkillər, eləcə də, şəxsi və iş yazışmalarından nümunələr yayımlayıb. FTB isə hücumu təsdiqləyərək sızdırılan məlumatların köhnə xarakter daşıdığını və hökumət məlumatlarını əhatə etmədiyini bildirib.
Hadisədən sonra ABŞ tərəfi “Handala” üzvlərinin müəyyənləşdirilməsi üçün mükafat mexanizmini önə çıxarıb. “Associated Press” və digər mənbələrin məlumatına görə, Vaşinqton qrupun üzvlərinin şəxsiyyətinin müəyyənləşdirilməsinə kömək edəcək informasiya üçün 10 milyon dollara qədər mükafat təklif edir.
“Reuters” yazır ki, “Handala” özünü fələstinpərəst “vigilante” haker qrupu kimi təqdim etsə də, Qərb tədqiqatçıları onu İran hökumətinə bağlı kiberkəşfiyyat strukturlarının istifadə etdiyi platformalardan biri hesab edirlər. Qrup son günlərdə Miçiqan ştatında yerləşən “Stryker” şirkətinə və “Lockheed Martin” əməkdaşlarına aid məlumatlara yönəlmiş hücumlarla da gündəmə gəlib.
Kaş Patelin hesabına hücum məsələsi ABŞ-da yüksək vəzifəli şəxslərin şəxsi rəqəmsal təhlükəsizliyi ilə bağlı narahatlığı yenidən artırıb. “Reuters”-ə görə, hakerlər Patelə aid 2010–2019-cu illəri əhatə edən 300-dən çox e-poçtdan seçmələr paylaşıblar. ABŞ rəsmiləri hesab edir ki, bu tip “hack-and-leak” əməliyyatlarının məqsədi amerikalı rəsmiləri nüfuzdan salmaq və onları zəif görünən hədəfə çevirməkdir.
Bu fonda sosial şəbəkələrdə yayılan bəzi paylaşımlarda “Parsian Afzar Ryan Borna” adlı strukturun da diqqət mərkəzində olduğu bildirilir. “Reuters”-in 20 mart tarixli materialında həmin ad birbaşa çəkilməsə də, ABŞ-ın ələ keçirdiyi domenlərin və araşdırmanın İranla əlaqəli kibermühitə yönəldiyi vurğulanır. Buna görə də hazırda dəqiq təsdiqlənmiş əsas fakt “Handala Hack Team”ə görə 10 milyon dollara qədər mükafat elan edilməsi və Kaş Patelin şəxsi e-poçtunun hədəf alınmasıdır.
