ABŞ Prezidenti Donald Trampın administrasiyası miqrasiya nəzarətini sərtləşdirmək məqsədilə 75 ölkədən olan müraciətçilər üçün immiqrant vizaların verilməsi prosesini müvəqqəti olaraq dayandırır.
ABŞ Dövlət Departamentinin sözçüsü bildirib ki, qərar Latın Amerikası, Balkanlar, Cənubi Asiya, Afrika, Yaxın Şərq və Karib hövzəsinə daxil olan çoxsaylı ölkələri əhatə edir və yanvarın 21-dən qüvvəyə minəcək. Dayandırma Braziliya, Kolumbiya və Uruqvay kimi Latın Amerikası ölkələrini, Bosniya və Albaniya daxil olmaqla Balkanları, Pakistan və Banqladeş kimi Cənubi Asiya ölkələrini, həmçinin Afrika, Yaxın Şərq və Karib regionunun bir sıra dövlətlərini əhatə edəcək.
ABŞ diplomatik nümayəndəliklərinə göndərilmiş rəsmi teleqramda bildirilib ki, Dövlət Departamenti bütün viza müraciətçiləri üçün “ən yüksək səviyyədə yoxlama və qiymətləndirməni” təmin etmək məqsədilə siyasət, qayda və təlimatlara dair tammiqyaslı baxış keçirir. Teleqramda qeyd olunur ki, sözügedən ölkələrin vətəndaşlarının ABŞ-da dövlət sosial yardım proqramlarından istifadə etməyə meylli olduqlarına dair göstəricilər mövcuddur və bu səbəbdən onlar “ictimai yükə çevrilmə riski yüksək” olan kateqoriya kimi qiymətləndirilir.
Qərar ABŞ-ın ziyarətçi vizalarına şamil edilmir və bu vizalar 2026-cı il Dünya Kuboku və 2028-ci il Olimpiya Oyunlarına ev sahibliyi edəcək ABŞ üçün xüsusi diqqət mərkəzində qalır. Dövlət Departamentinin baş sözçü müavini Tommi Piqott bildirib ki, qurum uzun müddətdir mövcud olan səlahiyyətlərindən istifadə edərək ABŞ üçün “ictimai yük” yaradacaq və sosial yardımlardan sui-istifadə edə biləcək potensial immiqrantları uyğunsuz hesab edəcək. Onun sözlərinə görə, 75 ölkədən immiqrant viza müraciətlərinin dondurulması immiqrasiya prosedurlarının yenidən qiymətləndirilməsi və sosial təminat sistemindən asılılıq riskinin qarşısının alınması məqsədi daşıyır.
Teleqramda ABŞ konsulluq əməkdaşlarına artıq “çap üçün icazə verilmiş”, lakin hələ çap edilməmiş vizaların, eləcə də çap edildiyi halda konsulluq bölməsindən çıxarılmamış sənədlərin rədd edilməsi tapşırılıb. Qərar Trampın yanvarda yenidən hakimiyyətə qayıtmasından sonra həyata keçirilən genişmiqyaslı miqrasiya sərtləşdirməsinin tərkib hissəsidir. Administrasiya qeyri-qanuni miqrasiyaya qarşı sərt tədbirlərlə yanaşı, qanuni miqrasiyanı da çətinləşdirən addımlar atıb, o cümlədən yüksək ixtisaslı mütəxəssislər üçün “H-1B” vizalarına əlavə və bahalı rüsumlar tətbiq edib.
Kato İnstitutunun Miqrasiya Araşdırmaları üzrə direktoru Devid Bir bu qərarı ABŞ tarixində “qanuni miqrasiyaya qarşı ən sərt gündəm” adlandıraraq bildirib ki, bu addım faktiki olaraq ABŞ-a qanuni miqrasiyanın təxminən yarısını dayandıracaq və təkcə növbəti bir il ərzində 315 minə yaxın qanuni immiqrantın ölkəyə girişinə mane olacaq. Dövlət Departamenti Trampın vəzifəyə başladığı gündən bəri 100 mindən çox vizanın ləğv edildiyini də açıqlayıb. Administrasiya, eyni zamanda, sosial şəbəkə hesablarının daha sərt yoxlanılması və genişləndirilmiş təhlükəsizlik qiymətləndirmələri ilə viza verilməsinə dair tələbləri sərtləşdirib.
Məlumata görə, qərardan təsirlənəcək ölkələr sırasında Əfqanıstan, Albaniya, Əlcəzair, Ermənistan, Azərbaycan, Banqladeş, Belarus, Bosniya, Braziliya, Kolumbiya, Kuba, Misir, Efiopiya, Gürcüstan, Haiti, İran, İraq, Qazaxıstan, Kosovo, Livan, Liviya, Mərakeş, Nigeriya, Pakistan, Rusiya, Suriya, Tunis, Uruqvay, Özbəkistan, Yəmən və daha onlarla dövlət var.
