İrəvan rusiyalı təbliğatçı Vladimir Solovyovun Ermənistanda “xüsusi hərbi əməliyyat” aparmaq çağırışlarına rəsmi reaksiyasını bildirib.
Ermənistanın Televiziya və Radio Komissiyasının sədri Tiqran Akopyan Solovyovu “Qürur Ordeni”ndən məhrum etməyi təklif edib.
Solovyov 2013-cü ilin dekabrında Ermənistan və Rusiya xalqları arasında dostluğun inkişafına verdiyi töhfələrə görə bu mükafata layiq görülmüşdü.
Akopyan açıqlamasında vurğulayıb ki, Solovyov ölkəyə və erməni xalqına davamlı təhdidlər edir və Ukraynada baş verən faciələrin təkrarlanmasını təklif edir: yüzlərlə dağıdılmış yaşayış məntəqəsi, milyonlarla məcburi köçkün, çirklənmiş təbiət, minlərlə ölüm. Onun fikrincə, belə münasibəti olan şəxs ölkənin yüksək mükafatına layiq deyil və “Qürur Ordeni”ndən məhrum edilmək ilk və vacib addım olmalıdır.
