İtaliya prokurorluğu şənbə günü bildirdi ki, ölkədə fəaliyyət göstərən xeyriyyə təşkilatları vasitəsilə HƏMAS-ı maliyyələşdirməkdə şübhəli bilinən 9 nəfər həbs edilib. Bu əməliyyat anti-mafiya və anti-terrorizm bölmələrinin koordinasiyası ilə həyata keçirilib.
Şimal İtaliyanın Cenevrə şəhərindəki prokurorluq bəyan edib ki, həbs edilən şəxslər Avropa İttifaqı tərəfindən terror təşkilatı kimi tanınan Fələstin qrupuna “aid olmaq və maliyyə dəstəyi göstərməkdə” ittiham olunurlar.
Prokurorluğun açıqlamasına görə, şübhəlilər son iki ildə humanitar məqsədlə yığıldığı iddia edilən təxminən 7 milyon avronu HƏMAS-a bağlı qurumlara yönəldiblər. Polis əməliyyatında 8 milyondan çox avro dəyərində əmlak müsadirə edilib.
Digər bir açıqlamada isə qeyd olunub ki, HƏMAS yönümlü xeyriyyə təşkilatının ofislərində və şübhəlilərin şəxsi evlərində 1,08 milyon avro nağd pul və HƏMAS-a aid materiallar aşkarlanıb.
İtaliya araşdırması şübhəli maliyyə əməliyyatlarının aşkarlanmasından sonra başlayıb və Hollandiya və digər Avropa ölkələri ilə əməkdaşlıq, eləcə də EUROJUST vasitəsilə koordinasiya olunub.
İtaliya Baş naziri Ciorcia Meloni əməliyyatı “xüsusilə mürəkkəb və əhəmiyyətli” adlandıraraq HƏMAS-a maliyyə dəstəyinin aşkar edilməsini alqışlayıb.
İsrailin İtaliyadakı səfiri Conatan Peled polis əməkdaşlarının işini yüksək qiymətləndirib:
“Radikal İslam elementlərinin terrorizmi təşviq etməsinin qarşısını almaq üçün İtaliya hökuməti və hüquq-mühafizə orqanlarına fəaliyyətinə görə təşəkkürümü bildirirəm,” – deyə o “X” sosial şəbəkəsində yazıb.
Xatırladaq ki, Meloni Qəzza savaşında İsrailə dəstəyini nümayiş etdirib və bu, İtaliyada geniş küçə etirazlarına səbəb olub. Qəzza səhiyyə nazirliyinin məlumatına görə, İsrailin hücumu nəticəsində 71,000-dən çox insan həyatını itirib. Hücum 2023-cü il oktyabrın 7-də HƏMAS tərəfindən İsrailin cənubuna təşkil olunmuş hücumdan sonra baş verib və təxminən 1,200 insanın ölümü ilə nəticələnib.
