İngiltərənin Kent bölgəsində, Midvey çayının ortasında yerləşən və özəl ada üzərində inşa edilmiş Viktoriya dövrünə aid Fort Darnet, 40 ildən sonra ilk dəfə satışa çıxarılır. Tarixi qala, “Savills” tərəfindən 10 dekabrda keçiriləcək açıq hərracda 50 min sterlinq, yəni təxminən 111.5 min AZN qiymətində təklif olunacaq.
XIX əsrdə hərbi müdafiə məqsədilə inşa edilmiş Fort Darmet özəl adası tarixi strukturu ilə həm investorların, həm də tarix həvəskarlarının marağını çəkir. 40 ildən sonra ilk dəfə satışa çıxarılması bu marağı daha da artırır.
Qala, yalnız qayıqla çatıla biləcək təcrid olunmuş bir mövqedə yerləşir. Bu isə onu “tamamilə özəl bir sahə” axtaranlar üçün cazibədar edir.
1870–1872-ci illərdə Çethem donanma tərsanəsini qorumaq məqsədilə inşa edilmiş Fort Darnet, 1979-cu il “Antik Abidələr və Arxeoloji yerlər Qanunu” çərçivəsində qorunur. “Savills Auctions” nümayəndəsi Ben Fletçer, açıq hərraca böyük maraq göstəriləcəyini bildirib və “Darnet qalası, ingilis hərbi tarixinin nadir bir hissəsinə sahib olmaq imkanı təqdim edir” deyə əlavə edib.
Dairəvi formada inşa edilmiş qala, üst açıq platforması və alt hissədəki toplu müdafiə nöqtələri ilə diqqət çəkir. Tarixən toplantı və piknik sahəsi kimi istifadə edilən ada, həm tarixi əhəmiyyəti, həm də investisiya potensialı ilə nadir fürsət hesab olunur.
