Azərbaycan Prezidenti İlham Əliyev oktyabrın 16-da Hindistan və Gürcüstanın ölkəmizdə yeni təyin olunmuş fövqəladə və səlahiyyətli səfirlərini qəbul edib. Görüşlərdə ikitərəfli münasibətlərin inkişafı və əməkdaşlığın genişləndirilməsi imkanları müzakirə olunub.
MSNews.az xəbər verir ki, Hindistanın yeni səfiri Abhay Kumar və Gürcüstanın yeni səfiri Qiorqi Zakaraşvili etimadnamələrini dövlət başçısına təqdim ediblər. Bu barədə Azərbaycan Prezidentinin Mətbuat xidməti məlumat yayıb.
Hindistan səfiri ilə görüşdə Azərbaycan və Hindistan xalqları arasında minilliklərə söykənən tarixi-mədəni əlaqələr vurğulanıb. Tərəflər ikitərəfli münasibətlərin müxtəlif istiqamətlərdə inkişaf perspektivlərinə dair fikir mübadiləsi aparıblar.
Söhbət zamanı Prezident İlham Əliyevlə Hindistanın Baş naziri Narendra Modinin bu ilin sentyabrında Bişkekdə Şanxay Əməkdaşlıq Təşkilatının Zirvə Görüşü çərçivəsində baş tutan təmasları da xatırlanıb. Abhay Kumar iki ölkə arasında münasibətlərin inkişafı üçün səylərini əsirgəməyəcəyini bildirib.
Gürcüstanın yeni səfiri Qiorqi Zakaraşvili ilə görüşdə isə Azərbaycan-Gürcüstan strateji tərəfdaşlığı, enerji təhlükəsizliyi, ticarət və nəqliyyat əlaqələri əsas müzakirə mövzuları olub.
Prezident İlham Əliyev bu ilin aprelində Gürcüstana dövlət səfərini məmnunluqla xatırladaraq iki ölkə arasında dostluq və strateji tərəfdaşlıq münasibətlərinin uğurla inkişaf etdiyini vurğulayıb.
Dövlət başçısı Azərbaycan və Gürcüstanın enerji və nəqliyyat sahələrində həyata keçirdiyi birgə layihələrin yalnız regional deyil, qlobal əhəmiyyət daşıdığını bildirib.
Qiorqi Zakaraşvili isə Azərbaycanla mövcud əməkdaşlığın daha da genişləndirilməsi istiqamətində çalışacağını qeyd edib. Görüşdə siyasi dialoqun inkişafından məmnunluq ifadə olunub, iqtisadi-ticari və nəqliyyat-kommunikasiya sahələrində tərəfdaşlığın perspektivləri nəzərdən keçirilib.
