Rusiyada işçi qüvvəsi çatışmazlığını azaltmaq məqsədilə bəzi əmək miqrantlarının rus dili, ölkə tarixi və qanunvericiliyin əsasları üzrə məcburi imtahanlardan azad edilməsi təklif olunub.
MSNews.az xəbər verir ki, Rusiya Daxili İşlər Nazirliyi bununla bağlı qanun layihəsi hazırlayıb. Bu barədə “Kommersant” nəşri məlumat yayıb.
Təklifə əsasən, güzəşt Rusiyanın xüsusi sosial-iqtisadi inkişaf ərazilərində fəaliyyət göstərən şirkətlərdə işləmək üçün icazə alan xarici vətəndaşlara şamil olunacaq. Bu şəxslər hansı ölkədən gəlmələrindən asılı olmayaraq, məcburi imtahanlardan azad edilə bilərlər.
Qərarın əsas məqsədi xüsusilə işçi qüvvəsi çatışmazlığı yaşanan regionlarda xarici mütəxəssislərin işə qəbulunu asanlaşdırmaq, investisiyaları təşviq etmək və iqtisadi inkişafı sürətləndirməkdir.
“Vedomosti” nəşrinin məlumatına görə, Rusiyada 90-dan çox xüsusi inkişaf ərazisi mövcuddur. Bu zonalarda 140 mindən artıq yeni iş yeri yaradılıb. Lakin müəssisələrdə ixtisaslı və digər işçi qüvvəsinin çatışmazlığı ciddi problemlərdən biri olaraq qalır.
Ekspertlər hesab edirlər ki, imtahanların ləğvi xarici işçilərin cəlbini sürətləndirə bilər. Bununla yanaşı, rus dilini bilməyən əməkdaşların istehsalat təhlükəsizliyi qaydalarını mənimsəməsində çətinliklərin yaranacağı barədə xəbərdarlıqlar da səsləndirilir.
Qeyd edək ki, təşəbbüs hələ qanun layihəsi mərhələsindədir və bütün əmək miqrantları üçün imtahanların ləğvini nəzərdə tutmur. Mövcud ümumi imtahan tələbləri qüvvədə qalır.
