Gənclərin Həmrəyliyi İctimai Birliyi tərəfindən gənclərin layihə və tədbirlərin idarə edilməsi sahəsində bilik və bacarıqlarının artırılması məqsədilə həyata keçirilən “SPM: Social Project Master” proqramı davam edir. 2025-ci ildən fəaliyyətə başlayan proqram indiyədək 150-yə yaxın gənci əhatə edib.
MSNews.az xəbər verir ki, proqramın əsas məqsədi gənclərin layihə və tədbir idarəçiliyi sahəsində nəzəri biliklərini artırmaq, praktiki bacarıqlarını inkişaf etdirmək və onların bu istiqamətdə peşəkar mütəxəssislərlə birbaşa ünsiyyətinə imkan yaratmaqdır.
Proqram çərçivəsində iştirakçılar layihələrin planlaşdırılması, tədbirlərin təşkili və koordinasiyası, risklərin idarə edilməsi, komanda ilə iş, münaqişələrin həlli, kütlənin və resursların idarə olunması kimi mövzular üzrə biliklər əldə edirlər.
Eyni zamanda gənclərin liderlik, effektiv ünsiyyət və problem həll etmə bacarıqlarının inkişafına xüsusi diqqət yetirilir. Bu məqsədlə müxtəlif sahələrdə fəaliyyət göstərən peşəkarların iştirakı ilə görüşlər təşkil olunur, iştirakçılara layihə idarəçiliyinin praktiki tərəfləri ilə tanış olmaq imkanı yaradılır.
İndiyədək proqram çərçivəsində SOCAR KBR MMC-nin Layihəyə Nəzarət Meneceri Kamran Cəbrayılov, Azərpoçt MMC-nin Layihə və Proseslərin İdarə Olunması Departamentinin direktoru İlkin Haxverdiyev, COP29 Əməliyyat Şirkətində koordinator Mənzər Məlikova və digər mütəxəssislərlə görüşlər keçirilib.
Görüşlər vasitəsilə gənclərin müxtəlif təşkilatlarda layihələrin idarə olunması təcrübəsi ilə tanış olması, peşəkarların bilik və təcrübələrindən faydalanması, eləcə də gələcək fəaliyyətlərində tətbiq edə biləcəkləri bacarıqları mənimsəməsi hədəflənir.
150-yə yaxın gəncin iştirak etdiyi “SPM: Social Project Master” proqramı layihə idarəçiliyi sahəsinə maraq göstərən gənclərin peşəkar inkişafına dəstək verməklə yanaşı, onların təşəbbüskarlığının və təşkilatçılıq potensialının gücləndirilməsinə yönəlib.
Qeyd edək ki, proqram hazırda davam edir. Layihəyə qoşulmaq və qarşıdakı tədbirlər haqqında məlumat əldə etmək istəyən gənclər Gənclərin Həmrəyliyi İctimai Birliyinin sosial şəbəkə hesablarını izləyə bilərlər.
