Türkiyə və Ermənistan Gümrü–Qars elektrik verilişi xəttinin bərpası və iki ölkənin enerji sistemlərinin birləşdirilməsi istiqamətində danışıqları davam etdirir. Paralel olaraq, Azərbaycan və Ermənistan nümayəndələri TRIPP layihəsi çərçivəsində elektrik xətlərinin yerləşdirilməsi ilə bağlı texniki məsələləri müzakirə edirlər.
MSNews.az xəbər verir ki, oktyabrın 5-də Ermənistanın ərazi idarəetmə və infrastruktur naziri Davit Xudatyan Türkiyənin Elektrik Ötürmə Korporasiyasının (TEİAŞ) rəhbəri Mustafa Pustunun başçılıq etdiyi nümayəndə heyətini qəbul edib.
Ermənistanın “Armenpress” agentliyinin məlumatına görə, görüşdə Gümrü–Qars elektrik xəttinin bərpası və yenidən istismara verilməsi istiqamətində görülən işlər nəzərdən keçirilib.
Türkiyə nümayəndə heyəti Ermənistanın Elektrik Enerjisi Sisteminin Operatoru və Yüksək Gərginlikli Elektrik Şəbəkələri şirkətlərinin rəhbərləri ilə də görüş keçirib.
Danışıqlar Azərbaycan və Ermənistan arasında enerji infrastrukturu üzrə təmasların intensivləşdiyi dövrə təsadüf edir.
Oktyabrın 8-də Ermənistanın Gorus şəhərində Azərbaycan və Ermənistanın aidiyyəti dövlət qurumlarının nümayəndələri TRIPP layihəsi çərçivəsində texniki görüş keçiriblər.
“Ermənistan İctimai Radiosu”nun məlumatına görə, görüşdə elektrik verilişi xətlərinin yerləşdirilməsi, qurumlararası koordinasiya və layihənin növbəti mərhələləri müzakirə olunub.
“İnterfaks” agentliyi isə xatırladır ki, Ermənistanın Baş naziri Nikol Paşinyan TRIPP layihəsi çərçivəsində Azərbaycan və Ermənistanın enerji sistemlərinin birləşdirilməsinin nəzərdə tutulduğunu bildirib.
Bundan başqa, Gümrü–Qars xəttinin istismara veriləcəyi tarix, maliyyələşmə mexanizmi və elektrik enerjisinin kommersiya ötürülməsinə başlanılması barədə yekun razılaşma məlum deyil.
