Səudiyyə Ərəbistanında işləyən 24 yaşlı Şri-Lanka vətəndaşı Anojan Sivarasa “Facebook”da İslam və Məhəmməd peyğəmbər barədə təhqiramiz şərh yazdığına görə apellyasiya məhkəməsi tərəfindən ölüm cəzasına məhkum edilib.
MSNews.az xəbər verir ki, “BBC” tərəfindən araşdırılan işə görə, hadisə Şri-Lankada dini zəmində yaranan sosial media mübahisəsindən sonra başlayıb. Başqa bir istifadəçinin hindu tanrısı haqqında təhqiramiz şərhinə cavab olaraq Sivarasa tamil dilində Məhəmməd peyğəmbər barədə təhqiramiz ifadə yazıb.
O, sonradan şərhi silib və üzrxahlıq videosu yayımlayıb. Lakin paylaşımın ekran görüntüləri onun Səudiyyə Ərəbistanındakı işəgötürəninə və daha sonra yerli hakimiyyət orqanlarına çatdırılıb. Sivarasa iyul ayında saxlanılıb.
Əl-Əhsa Cinayət Məhkəməsi ilkin mərhələdə ona 5 il həbs və 3 milyon Səudiyyə riyalı cərimə verib. Sivarasanın vəkilləri cəzanın yüngülləşdirilməsi üçün apellyasiya şikayəti veriblər. Prokurorluq isə əksinə, işin kibercinayət qanunvericiliyi ilə deyil, şəriət əsasında qiymətləndirilməsini tələb edib.
Sentyabrın 17-də apellyasiya məhkəməsi prokurorluğun mövqeyini qəbul edərək əvvəlki hökmü ölüm cəzası ilə əvəz edib. Hazırda iş üzrə Səudiyyə Ərəbistanının Ali Məhkəməsinə müraciət hazırlanır.
Şri-Lanka Prezidenti Anura Kumara Dissanayake Sivarasanın ailəsi ilə görüşüb və hökumətə bütün mümkün diplomatik və hüquqi vasitələrdən istifadə etməyi tapşırıb. Prezidentin Səudiyyə Ərəbistanı kralına əfv müraciəti göndərməsi də planlaşdırılır.
Dörd nəfərdən ibarət Şri-Lanka hüquq nümayəndə heyəti artıq Səudiyyə Ərəbistanına yola düşüb. Onlar Sivarasanı təmsil edən iki yerli hüquq firması ilə görüşərək Ali Məhkəməyə təqdim ediləcək sənədləri yekunlaşdıracaqlar.
Sivarasanın ailəsi bildirib ki, sentyabrın 28-dən onun vəziyyəti barədə birbaşa məlumat ala bilməyib. Səudiyyə hakimiyyəti isə mümkün edamın tarixi ilə bağlı ictimai açıqlama verməyib.
Şri-Lanka Xarici İşlər Nazirliyi məsələni Riyaddakı səfirlik vasitəsilə izlədiyini və bütün hüquqi xərcləri qarşılayacağını bildirib. Nazirlik eyni zamanda Səudiyyə Ərəbistanının məhkəmə prosedurlarına hörmət etdiyini vurğulayıb.
