Yaponiya hökuməti Ukraynadakı müharibə fonunda Rusiyaya qarşı sanksiyaları genişləndirib. Yeni paket çərçivəsində 9 fiziki şəxs və 33 təşkilata qarşı aktivlərin dondurulması və maliyyə əməliyyatlarının məhdudlaşdırılması tədbirləri tətbiq olunub.
MSNews.az xəbər verir ki, bu barədə Yaponiya Maliyyə Nazirliyi məlumat yayıb. Qərar oktyabrın 2-də Nazirlər Kabinetinin razılığı əsasında qəbul edilib və Xarici Valyuta və Xarici Ticarət haqqında qanuna uyğun olaraq həyata keçirilir.
Yeni tədbirlər yalnız fiziki şəxslər və şirkətlərlə məhdudlaşmır. Yaponiya 35 gəmini də sanksiya siyahısına daxil edib. Həmin gəmilərə müəyyən xidmətlərin göstərilməsi, eləcə də onların alqı-satqısı, icarəsi və fraxtı ilə bağlı bəzi kapital əməliyyatları icazə rejiminə keçirilib.
Tokio, həmçinin Rusiya və Belarusdan kənarda yerləşən 4 təşkilata ixracı qadağan edib. Yaponiya hökuməti bu şirkətləri Rusiyaya qarşı tətbiq edilən məhdudiyyətlər kontekstində sanksiya siyahısına daxil edib.
Bununla yanaşı, Rusiyanın sənaye potensialının gücləndirilməsinə töhfə verə biləcək malların ixracına dair qadağalar da genişləndirilib. Beləliklə, yeni paket həm maliyyə aktivlərini, həm dəniz nəqliyyatını, həm də Rusiyanın sənaye bazasına məhsul tədarükünü əhatə edir.
Yaponiya Xarici İşlər Nazirliyi qərarın Ukrayna ətrafındakı mövcud vəziyyət nəzərə alınaraq və digər aparıcı ölkələrin həyata keçirdiyi tədbirlərlə koordinasiya çərçivəsində qəbul edildiyini bildirib.
