NATO-nun Avropadakı Birləşmiş Qüvvələrinin Ali Baş Komandanı, ABŞ Hərbi Hava Qüvvələrinin generalı Aleksus Qrinkeviç Rusiyanın Avropadakı hibrid fəaliyyətinin əsas məqsədlərindən birinin Ukraynanın müttəfiqlərinin Kiyevə dəstək iradəsini sındırmaq olduğunu, lakin bu strategiyanın indiyədək istənilən nəticəni vermədiyini bildirib.
MSNews.az xəbər verir ki, Qrinkeviç bu barədə sentyabrın 28-də Brüsseldə Avropa İttifaqı qanunvericiləri qarşısında çıxışı zamanı danışıb.
Generalın sözlərinə görə, Avropa ölkələri hibrid hücumlarla üzləşdikdə Ukraynaya dəstəyi azaltmaq əvəzinə onu gücləndirməklə Moskvaya seçdiyi strategiyanın işləmədiyini göstərə bilərlər.
“Əgər ölkənizə qarşı hibrid hücum həyata keçirilirsə, Ukraynanı dəstəkləmək iradəsinin gücləndirilməsi ruslara strategiyalarının işləmədiyini göstərəcək”.
Qrinkeviç həmçinin Avropa dövlətlərini sabotaj və digər hibrid əməliyyatların arxasında kimin dayandığına dair kifayət qədər sübut olduqda bunu ictimai şəkildə açıqlamağa çağırıb. Onun fikrincə, belə addım bu cür əməliyyatların siyasi və əməliyyat xərcini artıraraq onları həyata keçirən dövlətlər üçün çəkindirici təsir yarada bilər.
General son həftələrdə Avropada qeydə alınan bir sıra hadisələri artan hibrid təhlükənin nümunələri kimi göstərib. Bunların sırasında Almaniyanın Leypsiq/Halle hava limanına pilotsuz uçuş aparatı ilə hücum cəhdi və Danimarka hərbi helikopterinin yaxınlığında Rusiya gəmisindən siqnal raketlərinin buraxılması da var.
Qrinkeviç daha əvvəl “Reuters”-ə müsahibəsində NATO-nun Rusiya ilə əlaqələndirilən sabotaj və digər hibrid fəaliyyətlər fonunda üzv ölkələr arasında kəşfiyyat məlumatlarının mübadiləsini gücləndirdiyini açıqlamışdı.
Bununla yanaşı, NATO komandanı vəziyyətə “sakit və özünəinamlı” yanaşmağa çağıraraq alyansın mümkün təhdidlərə cavab vermək imkanlarına malik olduğunu vurğulayıb.
Qrinkeviç sentyabrın əvvəlində verdiyi müsahibədə Rusiyanı Avro-Atlantik təhlükəsizlik üçün ən mühüm birbaşa və uzunmüddətli təhdid kimi xarakterizə etmiş, eyni zamanda NATO ölkələrinə qarşı yaxın zamanda birbaşa hücum təhlükəsi görmədiyini bildirmişdi.
