Danimarka hökuməti Ukraynanın müharibədən nisbətən az təsirlənən bölgələrindən gələn şəxslər üçün müvəqqəti yaşayış icazəsi qaydalarını sərtləşdirməyə hazırlaşır.
MSNews.az xəbər verir ki, “Ritzau”nun məlumatına görə, hökumət Ukrayna üzrə xüsusi qanun çərçivəsində verilən yaşayış icazəsini ölkənin 14 regionundan gələn yeni müraciətçilər üçün məhdudlaşdırmaq istəyir. Miqrasiya və inteqrasiya naziri Morten Bödskov bunu bələdiyyələrin yeni gələnlərin yerləşdirilməsi və inteqrasiyası ilə bağlı artan yükü ilə əsaslandırıb.
Söhbət Çerkası, Çernivtsi, İvano-Frankivsk, Xmelnitski, Kirovoqrad, Kiyev vilayəti — Kiyev şəhəri istisna olmaqla, Lvov, Poltava, Rivne, Ternopil, Vinnitsa, Volın, Zakarpatye və Jitomir vilayətlərindən gedir. Danimarka hökuməti bu siyahını Norveçin tətbiq etdiyi yanaşma əsasında müəyyənləşdirib və təhlükəsizlik vəziyyəti dəyişdikcə regionların siyahısının yenilənə biləcəyini bildirib.
Bödskovun sözlərinə görə, dəyişikliklər Danimarkada artıq yaşayış icazəsi almış ukraynalılara şamil edilməyəcək. 2026-cı ilin may ayının əvvəlinə olan rəsmi məlumata görə, ölkədə Ukrayna üzrə xüsusi qanun əsasında yaşayış icazəsi almış təxminən 47 600 nəfər yaşayırdı.
Hökumət sosial yardım alan ukraynalılara münasibətdə də güzəştləri azaltmaq istəyir. Hazırda bu kateqoriyaya daxil olan şəxslər ümumi “iş öhdəliyi” qaydasından azaddırlar. Təklif qəbul edilərsə, onlar digər sosial yardım alan şəxslər kimi həftədə 37 saata qədər əmək və ya faydalı məşğulluq proqramlarında iştirak etməli olacaqlar. Əvvəlki hökumət hesablamalarına görə, dəyişiklik təxminən 12 min ukraynalını əhatə edə bilər.
Təhsil sahəsində də xüsusi rejimin mərhələli şəkildə aradan qaldırılması təklif olunur. Mövcud qaydalar ukraynalı uşaqların müəyyən hallarda ingilis və ya Ukrayna dilində, eləcə də distant formatda təhsil almasına imkan verir. Hökumətin planına görə, bu xüsusi güzəştlər ləğv edilərək ukraynalı uşaqların Danimarkanın ümumi təhsil sisteminə inteqrasiyası gücləndiriləcək.
Bödskov vurğulayıb ki, qaydaların sərtləşdirilməsi Kopenhagenin Ukraynaya siyasi və hərbi dəstəyindən geri çəkilməsi demək deyil. Danimarka hökuməti Ukraynanı Rusiyanın hücumlarına qarşı mübarizədə dəstəkləməyə davam edəcəyini bildirir.
