Sankt-Peterburqda bir qadın keçmiş sevgilisinin onun ChatGPT hesabındakı fərdiləşdirmə parametrlərini gizlicə dəyişərək süni intellektin münasibətlər barədə mübahisələrdə daha çox kişinin lehinə arqumentlər səsləndirməsini təmin etdiyini bildirib.
MSNews.az xəbər verir ki, Rusiyanın “Baza” nəşrinə danışan Olqa adlı Peterburq sakininin sözlərinə görə, o, dəyişiklikləri münasibətləri bitdikdən sonra aşkar edib. Hesabdakı göstərişlərdə kişi və qadın arasındakı konfliktlər müzakirə edilərkən daha çox kişinin mövqeyini dəstəkləyən arqumentlər təqdim etmək tələb olunub.
Olqa bildirib ki, keçmiş sevgilisi əlavə olaraq ChatGPT-dən bəzən kobud və söyüşlü ifadələr işlətməsini istəyib və bunu qadının guya “kənddə böyüməsi” ilə əsaslandırıb. Onun sözlərinə görə, həmin göstərişlər münasibət davam etdiyi vaxtda, özündən xəbərsiz hesaba əlavə edilib. Hadisəni üzə çıxardıqdan sonra kişi bunu “zarafat” adlandırıb və Olqanın dəyişiklikləri nə vaxt görəcəyini gözlədiyini deyib.
Qadının sözlərinə görə, o, münasibətlərində yaranan mübahisələri təhlil etmək, o cümlədən partnyorunun davranışında dəyərsizləşdirmə olub-olmadığını anlamaq üçün ChatGPT-dən tez-tez istifadə edib. Hadisəni işıqlandıran “Gazeta.Ru” da məlumatın ilkin olaraq “Baza”ya Olqanın özü tərəfindən verildiyini qeyd edir.
Texniki baxımdan belə müdaxilə mümkündür. OpenAI-nin rəsmi məlumatına əsasən, ChatGPT-də fərdi təlimatlar vasitəsilə istifadəçi modelə cavablarında nəzərə almalı olduğu xüsusi göstərişlər verə bilər. Bu təlimatlar dəyişdirildikdə yeni cavablara dərhal təsir göstərə bilir.
