Rusiya Prezidenti Vladimir Putinin yoxsulluğu, səhiyyə və təhsil sistemindəki problemləri, eləcə də infrastrukturun inkişafındakı çatışmazlıqları ölkənin əsas “düşmənləri” adlandırdığı çıxış yenidən sosial şəbəkələrdə yayılıb. Lakin söhbət yeni bəyanatdan deyil — Putin bu sözləri 27 sentyabr 2021-ci ildə söyləyib.
MSNews.az xəbər verir ki, Putin həmin vaxt hökumət sədri və baş nazir müavinləri ilə görüşündə Dövlət Dumasına seçkilərin nəticələrindən sonra səslənən qələbə çağırışlarına münasibət bildirirdi. O, bütün məqsədlərə nail olunduğunu demək üçün hələ tez olduğunu vurğulamışdı.
Putin çıxışında Rusiyanın qarşısında duran əsas problemləri belə təsvir etmişdi: əhalinin əhəmiyyətli hissəsinin yoxsulluğu, səhiyyə və təhsil sistemində həll olunmamış məsələlər və infrastrukturun inkişafındakı çatışmazlıqlar. Prezident əsas məqsədin isə ölkə vətəndaşlarının həyat səviyyəsi və həyat keyfiyyətinin yüksəldilməsi olduğunu bildirmişdi.
Bəyanatın konteksti də mühümdür. Putin həmin görüşdən əvvəl “Vahid Rusiya”nın seçki siyahısının liderləri ilə danışdığını və seçkilərdən sonra bəzi qərargahlarda “ura” səsləndiyini qeyd etmişdi. Buna cavab olaraq ölkənin daxili sosial-iqtisadi problemlərinin hələ həll edilmədiyini vurğulamışdı.
