İran parlamenti ABŞ və İsrail KİV-ləri də daxil olmaqla Tehran tərəfindən “düşmən” hesab edilən xarici media qurumlarına müsahibə verilməsini cinayət məsuliyyətinə cəlb edən qanun layihəsinin ümumi prinsiplərini təsdiqləyib. Təklifə əsasən, qadağanın pozulmasına görə 6 aydan 2 ilədək həbs cəzası tətbiq oluna bilər.
MSNews.az xəbər verir ki, “Reuters” İranın “Shargh” qəzetinə istinadən bildirir ki, məhdudiyyət ABŞ və İsrail mediası ilə yanaşı, bu ölkələr tərəfindən maliyyələşdirildiyi hesab olunan KİV-ləri də əhatə edə bilər. Belə media qurumlarına müsahibə vermək və onların müzakirələrində iştirak etmək qadağan olunacaq.
Digər xarici KİV-lərlə müsahibələr üçün isə İran Kəşfiyyat Nazirliyinə əvvəlcədən məlumat verilməsi nəzərdə tutulur. Layihə xarici səfirliklər, təşkilatlar və digər qeyri-İran qurumları ilə əlaqələrə də əlavə məhdudiyyətlər gətirir.
Bununla belə, qanun hələ qüvvəyə minməyib. İran parlamentinin Hüquq və Məhkəmə Komissiyasının üzvü Osman Salari bildirib ki, sənədin yalnız ümumi prinsipləri təsdiqlənib və ayrı-ayrı maddələr parlamentdə müzakirə olunaraq səsvermədən keçirilməlidir. Bundan sonra yekun mətn Konstitusiya Keşikçiləri Şurasının təsdiqini almalıdır.
Layihə xarici təsir və kəşfiyyat fəaliyyətinə qarşı mübarizə adı altında hazırlanıb. Daha ağır hallarda, məsələn, xarici kəşfiyyat xidmətlərinin göstərişi ilə İranın təhlükəsizliyinə və müstəqilliyinə zərər vurduğu iddia edilən fəaliyyətlərə görə daha sərt cəzalar da nəzərdə tutulur.
