Sudanın Çevik Dəstək Qüvvələri (ÇDQ) və onun müttəfiqləri Efiopiya sərhədi yaxınlığındakı strateji Kurmuk şəhərinə yenidən daxil olub. Şəhər cəmi bir ay əvvəl, iyulun 8-də Sudan ordusunun nəzarətinə keçmişdi.
MSNews.az xəbər verir ki, “Al Jazeera” hərbi və hökumət mənbələrinə istinadən ÇDQ və Sudan Xalq Azadlıq Hərəkatı–Şimalın (SPLM-N) Əbdüləziz əl-Hilu qanadının avqustun 13-də Kurmuka daxil olduğunu, ordu qüvvələrinin isə şəhərdən geri çəkilərək kənarda yeni mövqelər tutduğunu bildirib. ÇDQ də şəhərə nəzarəti ələ keçirdiyini açıqlayıb.
Kurmuk Mavi Nil ştatında, Efiopiya sərhədində mühüm nəqliyyat marşrutu üzərində yerləşir. ÇDQ şəhəri martda ələ keçirmiş, Sudan ordusu isə iyulun əvvəlində keçirilən əməliyyat nəticəsində geri qaytarmışdı. Bir gün əvvəl ÇDQ yaxınlıqdakı Geysan şəhərini də ələ keçirdiyini bəyan etmişdi. “Reuters” bu məlumatın ÇDQ tərəfindən açıqlanmasını təsdiqləyib, lakin Sudan ordusunun həmin vaxt Geysanla bağlı şərh vermədiyini qeyd edib.
Kurmuk administrasiyası son hücumların üç gün ərzində PUA və artilleriya zərbələri ilə müşayiət olunduğunu, bəzi atəşlərin “regional qonşuluqdan” gəldiyini iddia edib. Sudan hakimiyyəti daha əvvəl Efiopiyanı ÇDQ-yə logistika və PUA dəstəyi verməkdə ittiham etmişdi. Əddis-Əbəbə bu ittihamları rədd edir və Efiopiyanın hazırkı əməliyyata yardım göstərdiyi müstəqil şəkildə təsdiqlənməyib.
Eyni zamanda Şimali Kordofanda döyüşlər davam edir. Sudan ordusu strateji nəqliyyat qovşağı olan Cabra əş-Şeyxə ÇDQ-nin hücumunu dəf etdiyini açıqlayıb. Ordunun məlumatına görə, hücumda 250-dən çox döyüş maşını iştirak edib. “Anadolu Agentliyi” qeyd edir ki, bu rəqəm Sudan ordusunun bəyanatına əsaslanır və döyüş meydanındakı itkilər müstəqil şəkildə təsdiqlənməyib.
Ştatın paytaxtı Əl-Ubeyd də PUA zərbələrinə məruz qalıb. “Reuters” tibbi mənbələrə istinadən şəhərə səkkiz PUA zərbəsi nəticəsində iki nəfərin öldüyünü və bir neçə şəxsin yaralandığını bildirib. Eyni gün Xartum, Atbara və Bahri də PUA hücumlarına məruz qalıb. Reuters həmin hücumların kim tərəfindən həyata keçirildiyini müstəqil təsdiqləyə bilmədiyini qeyd edib.
Avqustun 13-də isə Xartumda ardıcıl ikinci gün PUA hücumlarının qeydə alındığı bildirilib. “Asharq Al-Awsat” AFP və hadisə şahidlərinə istinadən hücumları ÇDQ PUA-ları ilə əlaqələndirib.
ÇDQ-nin xarici dəstəyi məsələsi də mübahisəli olaraq qalır. Sudan hökuməti Birləşmiş Ərəb Əmirliklərini ÇDQ-ni silahlandırmaqda ittiham edir; BMT ekspertləri və ABŞ qanunvericiləri bu istiqamətdə sübutları etibarlı hesab etdiklərini bildiriblər. BƏƏ isə ÇDQ-yə hərbi dəstək verdiyi barədə ittihamları dəfələrlə rədd edib.
2023-cü ilin aprelindən davam edən Sudan müharibəsi hazırda Mavi Nil, Kordofan, Darfur və paytaxt bölgəsi də daxil olmaqla bir neçə istiqamətdə paralel şəkildə intensivləşir. BMT münaqişəni dünyanın ən ağır humanitar böhranlarından biri kimi qiymətləndirir.
