Rusiya Müdafiə Nazirliyi Odessa İstilik Elektrik Mərkəzi və regiondakı yeddi elektrik yarımstansiyasına kombinə edilmiş raket-aviasiya zərbəsi endirildiyini açıqlayıb.
MSNews.az xəbər verir ki, “İnterfaks” Rusiya Müdafiə Nazirliyinə istinadən zərbələrin 330 kV-luq “Usatovo”, “Sentropolit”, “Artsiz”, “Novoodesskaya” və “Mayaki”, eləcə də 110 kV-luq “Belqorod-Dnestrovski” və “Karolino-Buqaz” yarımstansiyalarına endirildiyini yazıb. Rusiya tərəfi hücumların görüntülərini də yayımladığını bildirib.
Ukrayna tərəfi isə avqustun 9-na keçən gecə Odessa və ətrafına genişmiqyaslı raket və pilotsuz uçuş aparatı hücumunun həyata keçirildiyini təsdiqləyib. “Reuters” Ukrayna Energetika Nazirliyinə istinadən regiondakı enerji obyektlərinin zədələndiyini və çox sayda istehlakçının elektrik enerjisiz qaldığını bildirib. Hücumdan sonra ilkin mərhələdə təxminən 90 min abonentin elektrik təchizatı bərpa edilib.
Ukraynanın enerji şirkətləri sonrakı bərpa işləri nəticəsində elektriklə təmin olunan abonentlərin sayının 128 mindən çox olduğunu açıqlayıb. Bununla belə, Ukrayna rəsmiləri Rusiya Müdafiə Nazirliyinin sadaladığı yeddi yarımstansiyanın hamısının vurulduğunu ayrıca təsdiqləməyiblər.
Hücum zamanı Odessanın liman infrastrukturu da zərər görüb. Ukrayna Prezidenti Volodimir Zelenski Rusiyanın Odessa limanlarına zərbələrini ölkənin ixrac imkanlarına və qlobal ərzaq təhlükəsizliyinə təhdid kimi qiymətləndirib.
