Ukrayna Prezidenti Volodimir Zelenski avqustun 8-də Serbiyaya rəsmi səfər edəcək. Bu, onun 2019-cu ildə prezident seçilməsindən sonra Serbiyaya ilk səfəri olacaq.
MSNews.az xəbər verir ki, “KoSSev” Serbiya Prezidenti Aleksandar Vuçiçin administrasiyasına istinadən səfərin rəsmən təsdiqləndiyini bildirib. Vuçiç Zelenskinin Belqradda qəbul ediləcəyini, görüşün proqramının isə daha sonra açıqlanacağını deyib. O, tərəflərin Avropaya inteqrasiya və digər mühüm məsələləri müzakirə edəcəyini qeyd edib.
Səfər barədə ilkin məlumatı “AFP” yüksək vəzifəli ukraynalı rəsmiyə istinadən yayıb. Mənbə səfərin siyasi və simvolik əhəmiyyət daşıdığını bildirərək, “Serbləri Rusiyanın tərəfindən uzaqlaşdırmalıyıq” deyib. Bu sözlər Zelenskinin deyil, adı açıqlanmayan Ukrayna rəsmisinin mövqeyidir.
Serbiya 2022-ci ildən bəri Rusiyaya qarşı Qərbin sanksiyalarına qoşulmayıb və Moskva ilə, xüsusilə enerji sahəsində yaxın əlaqələrini saxlayır. Eyni zamanda Belqrad Avropa İttifaqına üzvlüyə namizəddir və Ukraynanın ərazi bütövlüyünü dəstəklədiyini bəyan edir. Vuçiç iyulun 15-də Kiyevdə keçirilən Ukrayna–Cənub-Şərqi Avropa sammitində Zelenski ilə görüşmüşdü.
