Braziliyanın “Acelen Renováveis” şirkəti yerli makauba palmasının meyvəsindən dayanıqlı aviasiya yanacağı və bərpa olunan dizel istehsal etməyə hazırlaşır.
MSNews.az xəbər verir ki, “Reuters” layihənin ümumi dəyərinin təxminən 3 milyard dollar olduğunu, tikintinin başlanması üçün isə 1,5 milyard dollarlıq maliyyələşmənin təmin edildiyini yazır.
Bahiya ştatında tikiləcək bioloji emal zavodunun 2029-cu ildə fəaliyyətə başlaması və ildə 1 milyard litrədək yanacaq istehsal etməsi planlaşdırılır. Müəssisə gündə təxminən 20 min barrel xammal emal edə biləcək.
Şirkət makauba ağaclarını əsasən deqradasiyaya uğramış 180 min hektar ərazidə yetişdirməyi nəzərdə tutur. Zavod ilkin mərhələdə soya yağı və istifadə olunmuş mətbəx yağından da yararlanacaq.
