İspaniya millisi DÇ-2026-nın 1/8 final mərhələsində Portuqaliyanı 1:0 hesabı ilə məğlub edərək 1/4 finala yüksəlib.
MSNews.az xəbər verir ki, Dallasda keçirilən Pireney derbisində əsas vaxtın sonlarına qədər hesab açılmayıb. Matçın taleyini 90+1-ci dəqiqədə Mikel Merinonun vurduğu qol həll edib.
Görüş gərgin və ehtiyatlı mübarizə şəraitində keçib. Hər iki komanda hücumda böyük riskə getməməyə çalışsa da, İspaniya son dəqiqələrdə rəqib müdafiəsində yaranan boşluqdan istifadə edib. Rodrinin qazandığı cərimə zərbəsindən sonra sürətli ötürmə ilə Merino zərbə mövqeyinə çıxıb və topu Diogo Kostanın qoruduğu qapıdan keçirib.
Portuqaliya matç ərzində bir neçə təhlükəli epizod yaratsa da, qol vurmağı bacarmayıb. Kriştianu Ronaldu üçün bu görüşün mundial karyerasında son oyunlardan biri ola biləcəyi qeyd olunur.
İspaniya bu qələbə ilə turnirdə mübarizəni davam etdirir. Komanda 1/4 finalda ABŞ — Belçika cütünün qalibi ilə qarşılaşacaq.
