Kolumbiya millisi DÇ-2026-nın 1/16 final mərhələsində Qananı 1:0 hesabı ilə məğlub edərək növbəti mərhələyə yüksəlib.
MSNews.az xəbər verir ki, Kanzas-Sitidə keçirilən görüşdə oyunun taleyini erkən qol həll edib. Kolumbiyanın yeganə qolunu 14-cü dəqiqədə Con Arias vurub. Hücumun qurulmasında Luis Suaresin ötürməsi həlledici rol oynayıb.
Qarşılaşma isti hava şəraitində keçib və Kolumbiya oyunun böyük hissəsində üstün tərəf olub. Bu qələbə Kolumbiyaya 1/8 finalda İsveçrə ilə qarşılaşmaq imkanı verib. Görüş iyulun 7-də Vankuverdə keçiriləcək.
Qana ikinci hissədə hesabı bərabərləşdirməyə çalışsa da, Kolumbiyanın müdafiə xəttini yarmaqda çətinlik çəkib. Kolumbiya matç ərzində daha fəal oyun sərgiləyib, Luis Diasın bir qolu isə ofsayd səbəbindən qeydə alınmayıb.
Bu nəticə ilə Kolumbiya mundialda məğlubiyyətsiz seriyasını davam etdirib. Komanda qrup mərhələsində Portuqaliya, Özbəkistan və Konqo DR ilə mübarizə apardığı “K” qrupunu lider kimi tamamlamışdı. Qana isə məğlubiyyətdən sonra turnirlə vidalaşıb.
