ABŞ-ın müstəqilliyinin 250 illiyi münasibətilə Prezident Donald Trampa 321 təbii brilyantla bəzədilmiş eksklüziv üzük hədiyyə edilib.
MSNews.az xəbər verir ki, bu barədə Antwerp World Diamond Centre — AWDC məlumat yayıb.
Hədiyyə Brüsseldə “Cinquantenaire” Parkında keçirilən ABŞ-ın 250 illik yubiley tədbiri zamanı təqdim olunub. Zinət əşyasını Donald Trampın adından ABŞ-ın Belçikadakı səfiri Bill Uayt qəbul edib.
ABŞ səfiri üzüyün Antverpenin dünya miqyasında tanınan sənətkarlığını və iki ölkə arasındakı xüsusi əlaqələri əks etdirdiyini bildirib. Donald Tramp isə Antverpen almaz sektoruna video-mesajla təşəkkür edib.
AWDC-nin məlumatına görə, üzük Antverpenli zərgər və almaz ustası David Qotlib tərəfindən hazırlanıb. Zinət əşyası HRD Antwerp laboratoriyası tərəfindən sertifikatlaşdırılıb.
Üzük 18 karat qızıldan hazırlanıb və üzərində 321 təbii brilyant, həmçinin 75 digər qiymətli daş yer alıb. Dizayn Amerika “Super Bowl” çempionluq üzüklərindən ilhamlanıb və ABŞ müstəqilliyinin 250 illiyinə incə istinadlar daşıyır.
AWDC bildirib ki, hədiyyə yalnız yubiley simvolu deyil, həm də ABŞ və Antverpen arasında uzunmüddətli iqtisadi münasibətlərin göstəricisidir.
Mərkəzin sədri İsidor Mörsel qeyd edib ki, ABŞ nəsillər boyu Antverpen almaz sektoru üçün ən mühüm ticarət tərəfdaşı olub.
“Antverpendə ticarət edilən təbii almazların böyük hissəsi nəticədə amerikalı zərgərlərə və istehlakçılara çatır. Bu üzüklə biz davamlı iqtisadi münasibətləri qeyd etmək, eyni zamanda Antverpenin dünyada nəyi təmsil etdiyini — etibarı, sənətkarlığı və təbii almazı göstərmək istədik”, – Mörsel bildirib.
AWDC xüsusi olaraq vurğulayıb ki, üzüyün hazırlanmasında təbii almazlardan istifadə olunub. Qurumun açıqlamasında təbii və sintetik almazların çılpaq gözlə eyni görünə biləcəyi, lakin mənşə, nadirlik, dəyər və sosial təsir baxımından fərqli olduğu qeyd edilib.
Tədbir çərçivəsində qonaqlara təbii və laboratoriyada istehsal olunan almazlar arasındakı fərqlər barədə məlumat verilib. HRD Antwerp laboratoriyası qonaqların zinət əşyalarını yoxlayaraq onların təbii və ya sintetik almazdan ibarət olub-olmadığını müəyyən edib.
AWDC qeyd edir ki, bu hədiyyə həm ABŞ-ın tarixi yubileyini qeyd etmək, həm də Antverpenin almaz sənayesindəki çoxəsrlik təcrübəsini və ABŞ-la sıx ticarət bağlarını nümayiş etdirmək məqsədi daşıyır.
Üzüyün maddi dəyəri açıqlanmayıb.
